عملوها الكلاب

السلام عليكم ورحمة الله وبركاته

امبارح كان 27 رمضان . . وكنا رايحين مستشفي 57357 والحمد لله تمت

وأنا نازلة بقي من بيتي . . ورايحة اركب الميكروباص كالعادة

وبمشي في المشايات اللي ما بين الجناين علشان اختصر الوقت بدل ما امشي ع الشارع الفرعي

وبرضه كالعادة الجناين بيبقي فيها كام كلب كده

ومش بكون خايفة . . وواثقة من نفسي وبمشي عادي

بس المرة دي غير أي مرة

ماشية وشوفت كلب جديد ما بينهم لونه بلاك وعملاق

قولت عادي . . خليكي ماشية طول ما أنتِ مش خايفة مش هيجرالك حاجة

وبقول في دماغي بقي . . أحسن حاجة فيكي يا جنة إنك لما بتتحطي في موقف يتحتم فيه نقطة قوة

نقطة ضعفك بتتحول لقوة بسرعة

يعني لما أكون بخاف ولازم مش أخاف . . فعلا مش بخاف

وفضلت ماشية

وعندنا الجناين بقي محاوطها شجيرات طولها حوالي متر

وخلاص قربت من الكلاب . . الموجودة في الجنينة اللي ع شمالي وواقفة قريبة من فتحة بين الشجيرات

باقي مترين بيني وبين الكلب البلاك

لقيته بيهوهو أوي وبيجري عليا وطالع منه شر

روحت نطيت من فوق الشجيرة اللي محاوطة الجنينة اللي ع يميني

وطبعا وقعت ع وشي واتبهدلت عقبال ما قمت كان حوالي 5 كلاب حواليا من كل ناحية

محاصريني

وعمالة اهش فيهم بالشنطة بتاعتي ومنهاااااارة طبعا

بقيت عاملة زي الراجل اللي في المولد ولابس فستان ده وبيدوخ

اهش كلب واجري من الناحية ديه . . الاقي كلب خرم وخد مكانه وسبقني

فضلت اهش واعيط واجري ويجروا ورايا لغاية ما وصلت للشارع الفرعي

اللي غاظني بقي . . الاقي راجل بيقوللي يا بنتي متبقيش تدخلي من هنا تاني

والاقي واحد في الميكروباص عمال يبصلي كل شوية . . اتقهرت

يعني شافوني ومحدش هان عليه ينقذني . . فين الرجالة ؟

طبعا أول ما قابلت صديقتي عند الميكروباص حضنتها وقعدت اعيييييييييييييط

وأول ما حكيتلها هيه واخوها الصغير وقريبتها فطسوا من الضحك

واخويا عرف فطس برضه . . والاقيه يكلمني وانا راجعة من المستشفي مش سامعة منه غير ضحكه

هوه دلوقتي بقي راكبني الهوا

ماشية لقيت قطة ماسكة في رجلي . . ركبت الهوا :)

ربنا يستر مش يحصللي حاجة تاني

برستيجي اتدهور خلاص بعد اللي حصل . . الحمد لله إني رجعت بخير

استرها يارب