السلام عليكم ورحمة الله وبركاته
.
.
.
ده لأني محتاجة اتكلم . . فعلا لازم اتكلم . . وهنا هحكي حكايتي في سطور . .
يمكن ألاقي حل وأنا بحكي
دلوقتي أنا خدت الأجازة وبقيت فاضية لحاجات كتير . .
أولها إني أخد شوية قرارات في حياتي
شوية احس بحيرة رهيبة وإني هشد في شعري واخبط راسي في الحيط . .
بس أكيد مش هتهور واعملها
الحكاية كلها . . وقفة مع النفس
حكايتي ابتدت بقي من حوالي 9 سنين
بنوتة صغنونة متفوقة في دراستها وكل أملها تدخل كلية الهندسة والكل بيقولها يا باشمهندسة
بس للأسف جات أيام الثانوية العامة بقي واستهترت بحاجات كتير والأسباب كتير
وبالتغاضي عن الأسباب اللي ادتني ألم سخن أوي واتعلمت منها
وروحت وامتحنت قدرات في كلية الفنون التطبيقية ونجحت بس مدخلتش الكلية
واديني اهوه دخلت كلية التجارة وإدارة الأعمال بجامعة حلوان
خلصت السنة الأولي اهيه
قضيتها ازاي ؟
حاولت بكل الطرق المشروعة أدخل جامعة القاهرة اللي أي حد فينا نفسه يدخلها
جامعة ليها تاريخها بقي وسهلة ولذيذة وكل قرايبي فيها وبيتجاب فيها تقديرات بسهولة
وبعد ما خرجت خروجات كتيرة مع أخواتي وعملنا مكالمات هاتفية كتيييييييير . .
اتمشورنا ع الفاضي . . وجالي اكتئاب أكتر ما أنا مكتئبة
للأسف . . التوزيع الجغرافي كان عائق ليا إني أدخلها . . بم إني حاليا بقيت تابعة لمحافظة حلوان
استحملت أوووي الجامعة اللي دخلتها ومن أول يوم بكرهها . .
استحملت الكلية اللي أحب كام مادة فيها عملي والباقي بكرههم
وبم إني بدرس 13 مادة في الترمين . .
بحقد ع أصحابي في جامعة القاهرة بم إنهم بيدرسوا 10 مواد بس
(( مش حقد حقد يعني )) .
قدر الله وما شاء فعل
المهم قولت استحمل وتعدي السنة واحول ع طول جامعة القاهرة
مكنتش عارفة ان التوزيع الجغرافي هيفضل مستمر ع حاله حتي لو قعدت سنة وحولت
وطلع مينفعش أحول إلا لو في نطاق الجامعة . . بس ايه . . جنة مش هتستلم أبدا
متهيألي لو قعدت شوية كمان في جامعة حلوان . .
هبقي زنجية وهتخرج من الجامعة قرعة . . ده إذا اتخرجت يعني
بجد قضيت أيام ماليش نفس أقضيها تاني
داخلة كارهة كل حاجة في الجامعة وقولت أحبها . . اشتركت في نشاط علشان أحبها . .
مش عارفة تأثير النشاط كان عليا سلبي ولا إيجابي
في الفترة ديه افترقنا أنا وصحابي . .
الكل بقي مشغول وكون صحاب جداد بقي وحياة الجامعة خدته . .
وبقيت اروح الجامعة لوحدي وارجع لوحدي . . وأيام كتير مروحش . .
ما أنا ماليش في جو الجروبات واكنسل محاضرات وكده
بجد نفسي الأيام ديه متتكررش السنة الجاية تاني ويارب أنجح الترم صافي وأحول جامعة القاهرة .
_____
مشكلتي والمذاكرة . . . .
الحتة ديه بقي حساسة جدا . . محدش فاهمني ولا هيحسني أبدا فيها . .
خصوصا إن أنا مع نفسي
هنسي كل الأسباب اللي هيه خلقت كره جوايا من ناحية المذاكرة . .
هنسي إني مبقتش أعرف أركز في المذاكرة بسبب إني أدمنت التفكير
هنسي إني كل ركن في البيت كنت بذاكر فيه أيام ثانوي . . بيفكرني بنفس الأيام اللي مش عايزة افتكرها
هنسي أي شرخ حصل في حياتي . .
هنسي أحباط الناس اللي حواليا ما بين جوة البيت وبرة
دلوقتي أنا السبب في كل اللي أنا فيه . .
ولازم اقف وقفة جبارة علشان أرجع جنة البنت الشطورة بتاعة زمان
الحل يمكن يكون بسيط وسهل .
بس هبذل جهد جامد جدا علشان أحققه أكيد .
أبطل أزهق كل شوية بقي من حياتي
مش كل حد يخنق عليا في أي حاجة أحط في نفسي وأقهرها أكتر . .
لازم أتغلب فعلا عن النقطة ديه . . لأن رغم إنها بتكون مؤقتة بس بتأثر ع المذاكرة جامد
ربنا يسهلها يارب والحال يتظبط السنة ديه . .
و الحياة تبقي مريحة نفسيا أكتر وأعصابي تبقي جوة الفريزر وأحاول أريح نفسي واللي حواليا
وإن شاء الله كل حاجة هتبقي تمام وابتدي سنة جديدة في جامعة القاهرة
وانسي هندسة وتطبيقية وكل حاجة قوية مفترية وأركز صح في مذاكرتي ودراستي .
يارب
0 التعليقات:
إرسال تعليق