جانا العيد اهوه جانا العيييييد

امبارح اللي هوه تاني يوم العيد 9/12/2008 وأنا قاعدة بكمل مذاكرة جاتلي مكالمة من واحدة صاحبتي تبقي أخت واحد صاحب أخويا

علشان نتقابل أنا وهيه ومعانا بنت نفسها تشوفني تبقي أخت واحد صاحب أخويا وأخوها

المهم قولت وماله . . نشم هوا برضه . . ده احنا في عيد

ونزلت الساعة 5 ونص واتقابلنا . . وشربت عصير مانجة بالموز وهما عصير مانجة بالايس كريم هههه وفيه شريحة موز صغننة

وبعدها دخلنا أولاد رجب نعمل شوبينج علشان هما جاعنين وأنا جبت شيكولاتة

قعدنا نتمشي نتمشي لغاية ما وصلنا عند النادي وعايزين ندخل بقي

ولازم ندخل بعضوية حد واحنا أصلا مش مشتركين في النادي ده

المهم قولت لواحدة ست داخلة النادي هيه وبنتها تدخلنا معاها

ههههههه سألتنا سؤال كل ما افتكره اضحك

قالت : المهم معاكوا فلوس ؟ !

هههههههه ع أساس شيفانا شحاتين

اشحال لسة قايلالها لازم حد معاه عضوية يدخلنا

قولنا مبدهاش اهيه مصلحة وهتخلص

داخلين النادي بقي . .

الراجل بتاع الأمن بيسأل الست دول تبعك

ههههههههه الست الذكية لقيناه بصيتلنا بصة كده (( كأنها استحقار ولا ايه ))

وراحت قالتله : لااااااااا

نعم . . احنا نتفق برة وتطلعي معانا عيلة كده وتكسفينا

المهم قولنا مبدها نروح النادي اللي عندنا

البت اللي معانا أبداااااااااا . . أنا كل قرايبي فيه وهدخلكم يعني هدخلكم

وعملت مكالمات كتير كده وشكلها بقي وحش أوي ادامنا ومش دخلنا

وفي الآخر روحنا بيت العيلة بتاعها

أنا قاعدة بقي متغاظة ومفروسة وعايزة أروح لأني مش مرتاحة للبنت ديه

بس مش عارفة الطريق

وبعد مناقشات كثييييييرة . . دخلوا في الديييييييين

وكلام غريب بيتقال ادامي مش مقتنعة بيه تماما

والبنطلون أحسن من اللي بيلبسوا جيييييييييييييبة ؟!

ليه يا آنسة ؟!

أصلهم لما بيطلعوا مواصلة من المواصلات ولا حاجة . . رجلييييهم بتبااااااااان

طب يا آنسة أنا ماليش دعوة . . عن نفسي بلبس جيبة وبنطلون تحتها والحياة وردي آدامي

وعايزين يقنعوني بالعافية البنطلون أحسن من الجيبة

وهوبا دخلوا في حكاية عن الراجل اللي بيلبس جلبية قصيرة وتحتها بنطلون وجيه يوم فرحه مش لبس دبلة علشان بيقول بدعة . . وشغااااااااااالين تريقة

قولتلهم يا جدعان ما هوه لبسة ده سنة عن الرسول صلي الله عليه وسلم

ولبس الخاتم بتاع الخطوبة ده بدعة فعلا لأنه تقليد للكفااااار في أفراحهم

دخلولي بقي في السنة . . طب ما هوه ممكن يكون منظر ادام الناس

وهوه أصلا مش كده . . وبعدين أصلا لو الرسول صلي الله عليه وسلم كان في زماننا دلوقتي كان زمانه بيلبس بدل

يا ساااااااااتر . . ايه يا بنتي أنتِ وهيه

أولا مش نتكلم ونقول لو كان ولو مكانش علشان كده الكلام غلط

وكمان يعني ربنا أعلم بما في القلوب . . مش نقول بقي ده ايه وده ايه

ودخلوا في تفسييييييير الأحلام

صلي ع رسول الله

المهم لقيت البت بتفسر حلم أنا كنت حلمته . . التفسير خووووووووفني أووي

وسرحت أوووووووي وقولتلهم عايزة أروح بقي

وشوية لقتني بعيييييييييط

وعايزة أروح وأبحث في تفسير الأحلام . . لقيت كلام كتيييييييير كده . . فكل اللي هقوله ربنا يستر ويلطف بينا . . والحمد لله

المهم قالولي طب نلعب دور كوتشينة . . ولعبت معاهم وخلصت الأول واستعجلت البنت بقي عشان عايزة أروح

واحنا ماشيين بقي بتسألني . . اليوم كان حلو ؟! صح

بصيتلها بابتسامة . . الحمد لله

وسألت : ايه رأيك في البنت اللي كانت معانا

بصيتلها : وقولتلها مش أعرفها علشان أحكم

قالت شكلك مش ارتاحتلها وده كان باين

بصيتلها : وقولتلها خليكي واقفة هنا وروحت اشتريت وردة بيضا شكلها حلو أووووي

وادتهالها . . والبنت فرحت بيها أوي وأنا مشيت وهيه مشيييييييت

واديني كل ما برجع من مشوار

أقول : من خرج من داره اتقل مقداره

كملت ال 19 . . ياهووووووو

في وقفة عرفات كان يوم ميلادي ال 19 اللي هوه 7/12/2008

كنت مبسوطة أوي علشان حاجة معينة في حياتي

وعلشان الأيام ديه بتفكرني بأيام السنة اللي قبلها والدنيا برد كده (( الوقت اللي بحبه أوي في السنة )) وكانت من أجمل أيام حياتي

المهم جيت ع بالليل متضايقة بقي

محدش جابلي أي هدية ولا حد من عندي قاللي كل سنة وأنتِ طيبة غير محمد أخويا

مش معني هدية ديه . . يعني حاجة غالية والكلام ده

لاااااااااااااااا . . أنا كان نفسي في هدية وخلاص إن شاء الله حتي بونبون

بس ياللا بقي متشكرة

المهم أحمد اخويا التاني مش جابلي هدية وزعلت منه بقي

وجيت أقول لماما قوليلي كل سنة وأنتِ طيبة . . قالتلي : وأنتِ طيبة

قولت مبدهاش مش عااااايزة

وفي اليوم ده حصلت مشكلة عائلية كمان

يا جدعان أنا مش بعترف اه بحاجة اسمها عيد ميلاد وعلشان كده بقول إنه يوم

بس هوه ببقي عايزة حد يقوللي كل سنة وأنا طيبة بس

بس محمد بقي فرحني أوووووووي وشايفني متضايقة كده ومحدش من صحابي جالي ولا حاجة

راح نزل بالليل وراجع بقي وبفتحلة الباب لقيت في ايديه كانز

قولتله ايه ده أنت جايبلي كانز . . قاللي لا . . روحت قولتله شكرا ورجعت اقعد ع الكمبيوتر

وسبحان الله قاعدة كده . . وحاسة جوايا متضايق وعمالة أقول حتي أنتم مش افتكرتوني

ولقيت محمد كان جايب هدية ومخبييييييييييها

الفرحة ساعتها مش كانت سيعاني بقي

واليوم اتختم كده وأنا فرحانة والحمد لله

عايزة أقول حاااااااجة نفسي أقولها بقي

فيه لحظات بتبقي جميلة أوي في حياتنا . .

سواء مع والدك أو ووالدتك أو أختك أو أخوك أو زوجتك أو حبيبتك أو أصحابك أو أو . . . .

بتبقي اللحظات ديه حساسة أوي

يوم نجاح مثلا . . ببقي نفسي الكل حواليا وبيحييني

حد يجيبلي حتي حاجة ساقعة والاقيه فرحانلي

يوم ميلادي . . حد جايبلي إن شاء الله شيكولاتة مع هزار ورخامة

ولما الواحد يتجوز يجيله وردة في أي مناسبة

حاجات كتير أوي بتحصل الواحد بيستني فيها حاجة معينة . . بس مش بتحصل . . وبيحس بخذل كده

وطبعا مش هيقول لحد إنه اتضايق

يا جدعان الوردة بجنيه ونص تقريبا

وممكن بحاجة بنص جنيه تفرح اللي ادامك جدا وتخليه ينام وهوه مبسوط

بس غالبا بقي فيه جمود في المشاعر

وهنقول عادي

واللي كان نفسه يفرح بحاجة بسيطة اديه هينام ويكمل لبكرة

بس لو اتكلللللللللللللللللم . . هيتقال إنه حساس زيادة عن اللزوم ومش محتاجة وايه الهبل ده

هوه غالبا اختلاف في المشاعر مش أكتر

ويجعله عامر

هل ستكون القيامة يوم 13 ابريل 2036

تاريخ 13 ابريل 2036 يمكن ان يكون بداية النهاية لكارثة ارضية كبرى ولربما "يوم القيامة"، إذ ان النيزك المعروف بإسم Apophis والذي يتقاطع مسياره مع مدار الكرة الارضية، يمكن ان يصطدم بالارض في ذلك اليوم. لذلك تجري منذ اليوم نشاطات واسعة لمراجعة كافة الحسابات في محاولة لابعاد الكارثة المنتظرة.

يوم الجمعة، 13 ابريل من عام 2029 سيكون حاسماً وتحضيريا في الاعداد لليوم المذكور اعلاه، إذ في هذا اليوم سيكون سكان الارض مشرعة انظارهم الى السماء في محاولة لمتابعة حركة النيزك المنطلق بسرعة 20 الف كيلومتر في الساعة عند مرورة بمحاذاة الارض. هذا النيزك يبلغ قطره 250 متر ووزنه يصل الى 20 مليون طن ويمكن رؤيته من الارض بالعين المجردة.



من حسن الحظ لن يتقاطع مسيار هذا النيزك مع الارض في تلك الجمعة من عام 2029، ولكن ذلك لايعني ان خطر هذا النيزك قد زال. المشكلة انه إذا مر Apophis بقرب الارض بحدود 30 الف كيلومتر فأن حقل جاذبية الارض ستؤثر عليه وستغير مسياره بحيث انه في المرة القادمة والتي ستحدث بعد سبعة سنوات من الرؤية له، قد يكون لقائه مع الارض لامفر منه.

هذا النيزك حصل على اسمه من الاسطورة المصرية حيث يطلق هذا الاسم على الحية الهائلة التي تهدد نظام الارض، ولكن تهديد Apophis الحقيقي، لحسن الحظ، ليس بمستوى ماذكرته الاسطورة عن الحية الهائلة.

نيزك بهذا الحجم لايعني كارثة اممية شاملة، ومع ذلك فأن مايترتب على مثل هذا الاصطدام ذو ابعاد مخيفة. عام 1908 اصطدم جسم فضائي فوق التايغا الروسية وادى الى تخريب 2000 كيلومتر مربع من الغابات، بالرغم من ان قطره وصل الى 60 متر فقط. هذا الامر نفسه حدث مع النيزك الذي سقط في اريزونا الامريكية قبل 50 الف سنة وترك خلفة فوهة بعمق 170 متر وقطر 1200 متر، في حين كان قطره على الاغلب لايتجاوز 40 متر.

إذا اصطدم النيزك Apophis بالارض، فسيؤدي ذلك الى اطلاق طاقة تعادل 880 مليون طن من ت.ن.ت، او 60 الف قنبلة ذرية من مستوى قنبلة هيروشيما. هذه الطاقة كافية للقضاء على بقعة كبيرة من الارض. إذا كان سقوط النيزك في البحر، وهو الامر الاغلب، فسيؤدي ذلك الى خلق فوهه بعمق 2500 متر وقطر 8 كيلومتر. هذا الامر سيؤدي الى تسبيب تسونامي هائل سيزيل الحياة من على عشرات الاف الكيلومترات من الشواطئ القريبة.


الفلكيين تمكنوا من رصد هذا النيزك لاول مرة قبل ثلاث سنوات فقط، وبعد حساب طريق مسياره اعلنت ناسا يوم 24 ديسمبر من عام 2004 ان خطر اصطدام النيزك بالارض هو 1:233. وبهذا يجري لاول مرة تصنيف خطورة نيزك في المجموعة الثانية حسب مقياس تورينو، الذي يشير الى درجة خطورة الاجسام الكونية الموجودة في مسيارات تتقاطع مع مدار الارض. الحسابات الاخيرة تشير الى خطورة هذا النيزك في الاصطدام بالارض عام 2036 تصل الى 1:45000، حسب المقياس نفسه.



النيزك Apophis ليس هو الخطر الوحيد الذي يهدد الارض من الكون الخارجي. احتمال اصطدام نيزك بالارض هو امر واقعي تماما. يوم 29 اوغسطس من هذا العام سيقترب من الارض النيزك المرقم 85275، والذي يبلغ قطره بضعة كيلومترات، وتبلغ سرعته حوالي 40 الف كيلومتر في الساعة، وفي يوم 9 سيمبتمبر سيمر نيزكين اخرين اصغر بمسيار اكثر قربا من الارض. لحسن الحظ سيمروا جميعا على بعد آمن من الارض. اقربهم سيكون على بعد 12 مليون كيلومتر، وهو بعد يماثل 30 مر البعد الى القمر.

على المدى القريب لايوجد خطر مباشر، بالرغم من ان النيازك تتساقط يوميا على الارض، لحسن الحظ انها صغيرة للغاية. عند احتكاكها بجو الارض تحترق وتظهر وكأنها شهب ساقطة، اعتقد السابقون انهم حراس السماء تلاحق الجن. البعض منها قد يبقى منه مايكفي للوصول الى الارض ولكنه من الضآلة بحيث انه لايسبب اي ضرر.

الخطر الحقيقي الذي يهدد الارض يأتي من الاجسام الكبيرة. النيزك الاول جرى اكتشافه عام 1801 واطلق عليه اسم Ceres, واليوم تم احصاء 200000 نيزك بقطر يزيد عن 100 متر. من بينهم يوجد حوالي 1000 نيزك يملك قطرا يصل الى كيلومتر، وبالتالي يمكنه ان يسبب كارثة ذات ابعاد عالمية. اصطدام بمثل هذا النوع من النيازك هو الذي سبب، على الاغلب، انقراض الديناصورات قبل 65 مليون سنة، إضافة الى انقراض حوالي 85% من الكائنات البحرية.




منذ الكارثة العالمية الاخيرة، والحياة على الارض تنمو وتزدهر في إنتظار الكارثة الدورية القادمة. غير ان نجاحات الانسان تعطي الارض فرصة للخروج من قدرها. الخطوة الاولى قامت بها ناسا عندما وضعت خريطة للنيازك التي تشكل خطرا محتملا على مستقبل الارض. في تسعينات القرن الماضي انشأت ناسا مركزا بإسم Spaceguard Survey-program, والذي من واجباته رسم مسيارات دقيقة للنيازك التي تملك قطرا يزيد عن كيلومتر واحد. الان تملك ناسا معلومات عن 700 نيزك لها هذه المواصفات. إضافة الى ذلك لديها معلومات عن 4000 نيزك لهم احجام اصغر. قبل انتهاء عام 2020، يطمح الفلكيين الى ان ينجزوا خريطة مسيارات 90% من النيازك ذات القطر اكبر من 140 متر.

الخطوة الثانية هو تقرير مايمكن عمله عند تحديد نيزك له مسيار خطر. في الافلام الهوليدية نرى انهم يقترحون قنبلة نووية لتحطيم النيزك. في الواقع العملي يعتقد العلماء ان ارسال مركبة فضائية ثقيلة الى قرب النيزك كافي تماما، وتحافظ على مسافة معينة الى جانب النيزك. جاذبية المركبة كافية للتأثير على مدار النيزك بما يكفي لإبعاد مسياره عن الارض.

من اجل ان نجاح هذه الخطة يجب ان ترسل المركبة عام 2027، وثمن هذه المركبة سيكون حوالي 300 مليون دولار. هذا المبلغ هو في الحقيقة اقل 150 مليون دولار عن تكلفة ارسال المركبة الفضائية لمرة واحدة اليوم. ولكن من الذي سيدفع التكلفة؟ ومن الذي سيتحمل مسؤولية المشروع؟ ومن الذي سيتحمل مسؤولية احتمال الفشل؟


هنا اقدم لكم جدولا عن مقياس تورينو: Torinoskalan

لايعار انتباه	0	الجسم الكوني لايشكل اي خطر او انه سيحترق
خطر طبيعي	1	خطر تقاطعه قليل للغاية وعلى الاغلب ليس خطر
تهديد	2	الجسم الكوني سيكون قريبا من الارض، ولكن لاداعي للقلق
	3	احتمال الاصطدام بإضرار محلية تعادل 1%، يجب الانتباه
	4	احتمال الاصطدام بإضرار مناطقية تصل الى 1%. يجب الانتباه
خطر	5	خطر جدي، ولكن لازال الاصطدام غير مؤكد. يجب تحضير الاجراءات
	6	خطر الاصطدام مع كارثة محلية. يجب اتخاذ اجراءات سريعة
	7	تهديد جدي مع عواقب عالمية. تهئ اجراءات الكارثة العالمية
خطر مؤكد	8	اصطدام مؤكد. عواقب محلية او فيضان، يحدث كل 50-100 الف سنة
	9	اصطدام مؤكد. عواقب مناطقية. يحدث كل 10-100 الف سنة
	10	اصطدام مؤكد. عواقب عالمية، يمكن ان تقضي على الحياة. 100 الف سنة.

بقلم حمدي الراشدي


مصادر:
Meteor Crater i Arizona
99942 Apophis
Apophis colision map
Asteroid
Egyptian demon
Asteroid's
لرؤية افلام تعليمية عن الواقعة
13/2007 s.26-29

بص وشوف الدنيا بالعدل

كل واحد مننا بيشوف الدنيا ع مزاجه هوه . . مش بيستني يفكر إذا كان الحلو حلو فعلا والوحش وحش فعلا

بنحكم ع أي حاجة من غير تفكير وتدبير . . وبالتالي بيبقي انطباع خاطئ عن اللي حوالينا وحاجات كتير هتتلخبط في حياتنا

احكم بالعدل في حياتك . . اوعي تشوف الكويس وحش واوعي تشوف الوحش كويس

فكر بهدوء واتزان . . بص للدنيا بعين الإنصاف . . شوف كل حاجة حواليك زي ما هيه

شوفها صح علشان متتعبش

أنت لو بصيت للدنيا من غير ما تعدل . . يبقي هتشوف الحق باطل والباطل حق

وحكمك ع أي حاجة هيكون بظلم

اعدل في حياتك . . علشان تشوف الكويس كويس وتشكر فيه وتشوف الوحش وحش وتدعي لربنا يهديه ويتوب عليه

جرب كده وهتعيش سعيد في حياتك

الثقة بالله

الثقة بالله . . . . . . . يااااااااااااااااااااااااه

تخيلوها كده واستشعروها اووووووووووووي

كلها أمل مش يأس . . قوة مش ضعف . . صبر مش عجلة . . أمااااااان مش خوف

ياااااااااه يا جماعة

استشعروا كده حسن الظن بالله

طب شوفوا الحديث ده

عن أبي هريرة - رضي الله عنه - قال : قال النبي - صلى الله عليه وسلم - :

يقول الله تعالى : ( أنا عند ظن عبدي بي ، وأنا معه إذا ذكرني ، فإن ذكرني في نفسه ذكرته في نفسي ، وإن ذكرني في ملإ ذكرته في ملإ خير منهم ، وإن تقرب إلي بشبر تقربت إليه ذراعا ، وإن تقرب إلي ذراعا تقربت إليه باعا ، وإن أتاني يمشي أتيته هرولة ) .

يااااااااااااااااااه شوفتوا بجد . . شوفتوا الإسلام

تخيلوا إن ربنا معانا ع طوول وربنا بيذكرنا . . يااااااااه وكل ما بنقرب من ربنا بيقرب مننا أكتر وأسرع

مش فعلا احنا في غفلة . . أسأل الله الهداية والثبات

طب شوفوا جمال الحديث اللي جاي عن أبي هريرة – رضي الله عنه – قال : قال رسول الله صلى الله عليه وسلم - إن الله تعالى قال : من عادي لي وليا فقد آذنته بالحرب ، وما تقرب إلي عبدي بشيء أحب إلي مما افترضت عليه ، و لا يزال عبدي يتقرب إلي بالنوافل حتى أحبه ، فإذا أحببته كنت سمعه الذي سمع به و بصره الذي يبصر به ، و يده التي يبطش بها ورجله التي يمشي بها و لئن سألني لأعطينه ، و لئن استعاذني لأعيذنه -رواه البخاري .

من عادي لي وليا فقد آذنته بالحرب : فيكون من عادى و ليا من أولياء الله فقد آذن الله تعالى بالحرب وصار حربا لله

وما تقرب إلي عبدي بشيء أحب إلي مما افترضت عليه : العبادة هيه بمثابة تقرب من الله سبحانه وتعالي

يعني مثلا اننا نصلي ركعتين فريضة أحب الي الله من ركعتين سنة نصوم رمضان أحب إلي الله من صوم التطوع

نزكي بجنيه أحب إلي الله من جنيه صدقة

حج فريضة أحب إلي الله من حج تطوع . . ده كله بيأكد أهمية الفريضة في العبادة

و لا يزال عبدي يتقرب إلي بالنوافل حتى أحبه : احنا كل ما بنستمر في إقامة السنن ربنا بيحبنا وبنحمي نفسنا من الشيطان

ليه مش نصوم في سبيل الله . . نصلي النوافل . . نتفقه في الدين . . نحفظ أحاديث . . الخ

ربنا بيحبنا وكل ما بنقرب منه بيحبنا أكتر . .

، فإذا أحببته كنت سمعه الذي سمع به و بصره الذي يبصر به ، و يده التي يبطش بها ورجله التي يمشي بها . . . . .الله

تخيلوا إن ربنا بالنوافل اللي بنعملها بيحبنا . . نمشي في الشارع ربنا حافظنا من كل هامة ربنا هيكون سمعنا اللي بنسمع بيه . . يااااااااااااه

هيكون عيننا اللي بنشوف بيها . . ياااااااااااااه

ايدينا ورجلينا . . يعني ربنا موجود معانا في كل وقت . في أمان في الدنيا زي كده

ولئن سألني لأعطينه ، و لئن استعاذني لأعيذنه . . كل ما تنقرب من ربنا كل ما هيحبنا كل ما هيحفظنا كل ما هيدينا اللي نفسنا فيه . . المريض مش ييأس . . رحمة ربنا أقوي من أي شئ

يتقرب من ربنا ويسأله ويدعي و يصبر . . .الخ . . ربنا هيديله

وأعوذ بالله من الشيطان الرجيم

عايش في بيته وليه بابا وماما . . وتربيته بقت تربية شوارع

يا عيني يا عيني يا عيني ع الولا

هتكلم عن أطفال بيتنا . . (( New street kids ))

مع التطور السريع اللي حصل في عالم الالكترونيكس وبظهور الكمبيوتر والدش وغيره في حياة أطفالنا الكرام

ده الأطفال كانوا شايلين موبايلات وأنا مش شايلة وليا جارتي عندها 18 سنة وبتقول لاخوها اللي في ابتدائي ابيه

شوفتوا . . لازم نحترم أطفالنا . . دول هما اللي بقوا يربونا

الطفل من دول . . لازم نسمع كلامه . . . . أما ناخد بالجزمة

ندخل في الجد شوية بقي

في نظري صراحة إن أطفال الشوارع أحسن من أطفالنا

ع الأقل ياما قرصهم الجوع والبرد . . نزلوا واشتغلوا وشافوا الهم . . أبرياء وملهمش ذنب

لكن أطفالنا احنا . . واللي اتربوا وسط ماما وبابا . . كل طلباتهم مجابة ومفيش (( لا )) ليهم

بس نزلوا الشارع يلعبوا . . عرفوا ألفاظ لا تقال . . والله عندي فيديو اخويا مصوره لولد راجع من المدرسة هوه في ابتدائي . . وبيشرب سجاير . . وبيشفطها كده ويقعد فترة وبعدين يطلعها من مناخيره . . والكتب ع ايديه التانية

واجي ماشية بقي . . أشوف الأطفال وهيه بتلعب . . اسمع منهم اللي عمري ما سمعته شتايم وسب وألفاظ لا تقال . .

حتي كمان مش بقيت أشوف البنات بتلعب أولة وسبت وماما زمانها جاية وتيرو اتربوا فين دول بجد . . أباهاتهم وأمهاتهم في غاية الاحترام والطيبة

يبقي العيب منين

بابا وماما ظهروا مع عبد الحليم وفيروز وام كلثوم وعبد الوهاب

احنا ظهرنا مع عمرو دياب وايهاب توفيق ومصطفي قمر

أطفالنا ظهروا مع دانا وسعد الصغير وبعرور وروبي وهيفاء والأغاني الهابطة

لما امشي في الشارع واسمع طفل عنده بتاع 5 سنين بيغني " الحنطور"

وأنا اللي زمان وانا طفلة كنت أغني عمرو دياب " حواليك قلوب وقلوب "

وأكيد يعني بابا لما كان طفل كان يقول " وقف الخلق ينظرون جميعا كيف أبني قواعد المجد وحدي "

نيجي بقي للتربية

احنا اتربينا ع اه ولا وده صح وده غلط . . ولما نذاكر هيكافؤنا . . ولما ننجح هيجيبولنا حاجة حلوة . . ولما نكون كويسين وبنطيعهم هيجيبولنا هدايا

ديه تربيتنا

أطفالنا بقي اتربوا : عايز كذا ولازم ييجي . . معنديش لا صح ولا غلط . .بجاحة بطريقة فظيعة . .

طب والله ساعات بمشي بخاف يرموا عليا طوبة رخامة ولا حاجة

مرة ماشية أنا وصاحبيتي ومعانا حاجات حلوة . . لقينا التتار هجموا علينا . . وخطفوا مننا اللي احنا جايبينه واجي مثلا امسك الواد من أفاه واشيله . . الاقي في ايدي قرد

هل أهلهم بيتعاملوا بغباء معاهم ؟!

مفيش احترام صغير لكبير

احنا كنا بنحترم اللي أكبر مننا ومكسوفين منه

دول شياطين ع صغير

لما بلاقي طفل بيبيع . . بحس انه ملاك محكوم عليه بالاعدام انعدمت طفولته وانعدمت أحلامه وأماله . .

وكل حاجة بقت سراب ادامه ولازم يرضي باللي هوه فيه

تخيلوا احنا أطفالنا بقي هما اللي بيحكموا ع أحلامهم بالاعدام . .

أغلب الاطفال أسألهم نفسكم تبقوا ايه لما تكبروا . . يقولوا مش عايزين ومرة سألت طفل عايز تطلع ايه . . قاللي حرامي

أنا شوفت قبل كده مشهد فيديو . . طفل مسلم في 6 ابتدائي لابس تيشيرت عليه صليب وجاب السكينة ورسم ع ايديه صليب . . ليه . . علشان شافها ع ام بي سي 2

متشكرين أوي يا إعلامنا . .

نيجي بقي لناحية المذاكرة

مش كان في كمبيوتر ولا عندنا موبايل وبابا وماما علمونا صح ومش كان في كليبات العنب العنب ولا حتي كنا جبنا دش

أهم حاجة مذاكرتنا واجتهادنا وبنحب نقعد مع ماما وبابا

الطفل من دول مستني يخرج من المدرسة

يروح ع السايبر جري . . مبقاش يروح النادي ولا يشترك في لعبة ولا حتي يشرب لبن . . مفيش صحة ولا جسم سليم

وأهاليهم مبقتش فضيالهم علشان توجههم للصح

وكمان بقوا يفكروا في البنات . . وازاي يوقعوهم

أطفالنا بقوا أطفال نت أطفال شوارع أطفال بتوع بنات كمان . . لسة اخويا قايلي الأطفال دول بقوا يرتبطوا من وهما صغيرين

ديه مهزلة والله

لو هما كده

احنا لما نتجوز بقي أطفالنا هيبقوا عاملين ازاي

عندنا مدرس الرياضة أيام 3 ث الله يجازيه كل خير . . كان لازم كل ما يشرحلنا يقولنا حاجة عن الدين

ده بجد ما شاء الله . . هوه أولا جايب كمبيوتر في البيت ومن زمان ومش عليه غير اسلاميات وألعاب لعياله

مش عنده تلفزيون ولا دش . . وعمره ما هيدخله بيته . . ومع ذلك الاستاذ يعرف كل حاجة عن الفنانين من الجرايد وأصحابه

استاذ مثقف جدا جدا جدا جدا

طب والله أحسن حل نعالج بيه مشاكل كتيروهتعود علينا بمكاسب والله

ادينا هنوفر فلوسنا وهنوفر الكهرباء وكمان هنمنع الإعلام الفاسد يدخل بيتنا . .

عايزة أقول ان عيال الاستاذ بجد ملايكة . . وشهم منور كده وبنته صغننة ومحجبة . . ماشاء الله

ربنا يبارك فيه وفيهم

ويارب نشوف أطفالنا في الصورة الجميلة ديه

عايزة أتكلم

هتكلم شوية صراحة مع نفسي

أنا مش عارفة أوصف إحساسي دلوقتي

بس فعلا إحساسي مختلف تماما

يااااااااااااه . . رجعت كذا سنة لورا . . ده إحساسي

أنا بتغير فعلا وبرجع زي زمان

أنا مش عارفة أنا حزينة ولا فرحانة ولا أنا موودي ايه النهاردة

بس اللي حاسة بيه فعلا . . ودموعي اللي نازلة دلوقتي كده

إن فعلا الأجازة ديه كانت الفيصل النهائي لحياتي من قبل وحياتي ما بعد ذلك إذا شاء المولي وبقي لي عمر

النهاردة سمعت أنشودة كنت بحب أسمعها هيه ومجموعة أناشيد في 3 اعدادي

يااااااااااااااااااااااااه

هل يا تري حان الوداع فترقرقت منا الدموع وبقيت ذكري في الفؤاد منها تحرقت الضلوع

والله لن أنساكم حين التقينا بانشراح . . في هذه الأرجاء إذ قد أشرق الحب ولاح

مهلا صديقي لا تقل حان الوداع فلا اجتماع

إنا سنبقي أخوة وأحبة رغم الوداع

يا أخوتي يا فتية . . في ليلنا مثل الشموع

حول الكتاب تحلقت وتجمعت تلك الجموع

فإلي لقاء أخوتي و ع الصفاء سنلتقي والود يغمر قلبنا وإلي المعالي نرتقي

هل يا تري حان الــــــــــــــوداع

بجد أنا حاسة إني صريحة أوووي مع نفسي وإني بعد كده مش هعمل حاجة تأذيني خالص

حاسة إني برجع زي زمان

ياااااااااااه

فضلت 3 سنين نفسي أحس الإحساس اللي أنا حساه دلوقتي ومعرفتش

أنا كتير حاولت أبطل أسمع أغاني بس كنت برجعلها تاني

بس أنا بطلتها فعلا

وحاسة إن كل الأغاني اللي كنت بفضلها بقيت بكرهها أوووي

أنا بطلتها فعلا فعلا بلا رجعة . . الحمد لله

الحمد لله

أنا ع قدر حزني لمدة طويلة ألا إني حاسة أني سعيدة جداااا

بجد أنا أول ما سمعت الأنشودة حصل تطورات كتير

من دلوقتي أنا همشي زي ما قال رسولنا الكريم صلي الله عليه وسلم

(( من ترك شيئا لله أبدله الله خيرا منه ))

بجد من دلوقتي هستغني عن أي حاجة في حياتي لله

وهرجع أروح دروس المسجد تاني

نفسي أتكلـــــــــم كتير . . بس عندي كورس

هروح الكورس بإذن الله وهرجع للمدونة علشان نفسي أتكلم كتييييييييير

يارب . . محتاجـــــــــلك

حاجة كنت مخنوقة من فترة وكتبتها

السلام عليكم ورحمة الله وبركاته

يعني ايه اللي أنا فيه ده

يعني ايه إني أكون قاعدة وسط 4 حيطان

مخنوقة

محتارة

وحاسة إني خايفة

بجد بجد أنا خايفة

من ايه وليه . . أنا مش عارفة

طب اعمل ايه . . برضه مش عارفة

طب أنا كنت سعيدة . . جايز

أو مش فاكرة . . أو كنت أنا بوهم نفسي

اه اه أنا كنت سعيدة

كنت أنا أسعد مخلوقة

بين الناس أنا فرحانة . . ولا في في فرحتي فرحة

اشوف الحزن مالي عيونهم . . واللي القسوة أكلت قلوبهم ما بين المسكين . . واللي بيستقوي

ع مين . . وليه . . ده فعلا بيجنني

طب أنا مين ؟ لأ مش عارفة

أحيانا أشوف نفسي هزيلة . . ضعيفة . . خايفة من بكرة

وساعات ألاقي نفسي قوية . . و مرحة . . و يمكن سعيدة

طب أنا طبعي ايه . . أكيد الناس اللي هتحكم

ما هو يا إما تظلم . . يا إما تحكم بالعدل

العدل !!طب فين العدل ؟ فين العدل ؟ فيـــــــن ؟

بعد ما عشت حياتي . . وعدي 18 سنة وشوية . .أحس إني وحشة

بعد ما كنت فرحانة شهور . . بقيت حزينة

بعد ما كنت هموت من الفرحة . . اتاريني هموت من الخوف

و الاقي الناس جنت عليا

مش مهم مين ولا مين

المهم مكانة الناس دول عندي ايه

لما الاقي أقرب صاحب . . بقي بيخون

و أقرب جار . . مش موجود

وأقرب الناس . . بقي بيتمشكل و زعلان

اتاري . . الوحدة كانت أقرب . . مكان

يمكن غلطت في حكمي ع الناس

وعشان كده هطلب السماح

و أقول أنا آسفــــة . . عن اقتناع

ايه سر الخنقة اللي الشعب اتعدي بيها ؟

السلام عليكم ورحمة الله وبركاته

.

.

.

دلوقتي يا جماعة كل ما أسأل أي حد في أي مكان موودك ايه ؟ طقهان زهقان مخنوق

في اللي بيبقي مخنوق بسبب وفيه اللي مخنوق من غير سبب بس ليه بيتخنقوا

لو أنا مخنوقة كده لله في لله . . يبقي أنا مقصرة في حاجة . . سواء في العبادة أو حق والدي ووالدتي أو حق المذاكرة أو حق أصحابي أو أو

أكيد ده سر اللي مخنوق من غير سبب إنه مقصر

ييجي واحد تاني يقول أنا مخنوق علشان كذا مثلا أنا . . أنا أقول أنا مخنوقة علشان المذاكرة . . طب ما الحل إني أذاكر . . وادامي أذاكر وسايبة المذاكرة علشان مخنوقة منها

طب ما أرجع أفكر ليه مخنوقة منها وايه الأسباب اللي خنقاني منها وأحلها وأروق أعصابي بكوباية كركديه

واللي يخنق أكتر أنك تلاقي واحد تقوله أنا مخنوق يقولك وأنا كمان

المفروض يا جماعة نحس ببعض أكتر يعني أنا مثلا مخنوقة وحد جالي وقاللي أنا مخنوق أقوله ليه بس وايه اللي مزعلك واهون الأمر عليه

وبعد ما يصفي ويروق ويلاقي إنه عندي حق والدنيا متستاهلش الحزن ده كله

أقوله بقي انا مخنوق اليومين دول علشان كذا وكذا

حاجة جميلة إن الواحد يحكي لحد بيثق فيه عن اللي مضايقه كسبيل من الفضفضة

والواحد يحس براحة وده نوع من العلاج النفسي

أنت تقدر تعالج نفسك بنفسك . . المهم تعرف تخطط ازاي هتعرف تكون عزيمتك وقدرتك وتعتمد ع ربنا وبعدين تاخد بالأسباب ومتسلمش روحك للحزن والخنقة

واشكي لربك سبحانه وتعالي دايما

ربنا جمبك وقريب منك أووووي متبعدش عنه اشكيله علشان الشكوي لغير الله مذلة

بلاش تقول الدنيا سودا حواليا والتخرج والجيش والشغل والجواز ووووو

وتذل نفسك للغير ربنا حاسس بيك وبيقولك قرب مني . . يبقي قرب منه واشكيله همك وادعيله يفرجه عنك

حاجة بتغيظني جدا بسمعها كتير . . إن حد يقول اهيه عيشة والسلام . . وهناخد ايه يعني من الدنيا

طب ما هوه فعلا هناخد . . هناخد عملنا معانا . . ده عملنا ده بحسنه هينور قبورنا وبسؤه هيكون ظلام علينا في الدنيا والآخرة

اللهم استرنا فوق الأرض وتحت الأرض ويوم العرض عليك

احنا مخلوقين في الدنيا لهدف واحد هوه إننا نعبد ربنا . . ميجيش إنسان تافه بقي يقول ساعة لقلبك وساعة لربك

عايزين نخللي قلوبنا خاشعة لربنا سبحانه وتعالي . . ومنشغلش بالنا بحاجات تانية هتاخدنا لبعيد

عايزين نسيبنا من الأغاني ونقرب من القرآن أكتر . . عايزين نقرب من ربنا علشان هوه بيقرب مننا أكتر

ياريت فعلا تكون دعوة جميلة لترك الأحزان اللي بنعيش نفسنا فيها وفي الآخر هتقضي علينا وهتخلي حياتنا جمود

لا إله إلا الله