كملت 21 سنة النهاردة

السلام عليكم ورحمة الله وبركاته

النهاردة . . يوم ميلادي

هوه مش حزين ومش سعيد . . هوه " عادي "

كان نفسي افرح بصراحة . . اكلم أعز الناس وانبسط

وانزل مع اخويا ويفسحني

بس كله كله باظ

ولا هدية جاتلي . . ولا كلمة رقيقة من أعز الناس . . ولا اتفسحت

ولا حتي فيه جاتوه ولا تورتة والكلام الفاضي ده كله

ام ام ام . . بصراحة أنا بفكر ومش عارفة اعمل ايه

أعز الناس كلموني وحش . . واخويا راح انترفيو . . واخويا التاني نزل هوه وماما لوالدي في القاهرة الجديدة

وأنا قاعدة لوحدي دلوقتي

بفكر أنا احتفل لوحدي . . هوه أنا مش من أنصار أعياد الميلاد والحاجات الهابلة دي

بس أنا ببقي نفسي اكون فرحانة في اليوم ده علشان احط خطة للسنة الجديدة امشي عليها

بحس يعني إني اتولدت من جديد . . بيبقي حصل حاجات وحشة السنة اللي قبلها مش عايزة افتكرها

وبصدق اليوم ده ييجي فاركن كله وراء ظهري واركز في السنة دي

قاعدة قعدة صامتة . . حاسة مفيش حاجة فارقة

ومش عارفة اذاكر وخلاص حاسة بقت المذاكرة أمر ميؤس منه . . والسنة دي لا مفر منها

اعمل ايه يااااااااااااااارب

اروح اصلي العصر واجي ابدأ موضوع جديد . . يمكن يصلح اللي انكسر :)

طعم الحياة . . بنبون :)

السلام عليكم ورحمة الله وبركاته

ياهوووووووووووووو . . العالم بتاعي رجعلي

هوه اه لسة مش رجع كله . . بس أنا متفائلة

أحبــــــــــــــــــــــــك ربي

يا الله . . أحلي حياة في طاعتك . . يارب مبتردش حد يسألك أبدا

يااااااااه . . قبل ما كل حاجة تروح فعلا الواحد لازم يلحق نفسه . . ويدعي

قال صلي الله عليه وسلم : " لن ينفع حذر من قدر , ولكن الدعاء ينفع مما نزل ومما لم ينزل , وإن البلاء لينزل فيتلقاه الدعاء فيعتلجان ( يتصارعان ) إلي يوم القيامة "

مبسووووووووووووووووووووطة أوي يارب

وديمها علينا نعمة . . الحمد لك والشكر لك يا الله

ها أنا ذا . . أقبلت علي الدنيا ثانية . . بنفس راضية

الحمد لله يااااااااااااااااااااااااااااااااااااااااااااااااااااااااااارب

أنا الفرخة واحنا الكتاكيت . . اكلكوا ايه اكلكوا فتافيت . . لعبكوا ايه . . جري وتنطيييييييييط

مبسوووووووووووووووووووووووووووووووطة وحاسة إني طايرة

يارب ديمها يارب :)

محاولة فاشلة وحياة بائسة

السلام عليكم ورحمة الله وبركاته

حياة بائسة بالأبيض والأسود

عام جديد من عمري . . بدايته " لا تعليق "

أمر بأسوء اللحظات في حياتي

لم اضع هذا اليوم في الحسبان

فعندما رسمت أحلامي . . وقعت عليها " لا يمكن الرجوع عنها "

فعزائي لنفسي . . التي ادعو لها بالرحمة

لا إلــه إلا أنـــت سبحــــانك إني كنـــت من الظــالمين

Just Like Heaven

السلام عليكم ورحمة الله وبركاته

كم اشعر بالنجوم تتلألأ حولي . . وبيدي لمست أحلامي

تلك الضوء الساطع الذي لطالما حلمت به

أن أكون . . .

اشعر بشعلة أمل لامست قلبي فهلل

كم أنا فرحة الآن . . واشعر وكأنني أريد الحديث لمن لا أراهم

ادعو الله أن يكون ما في قلبي الآن . . هو في قلوبهم

واتسائل هل يشعرون بنا ؟!

لا اعرف مصدر فرحي . . ولكنني فرحت لفرحها

" ضاقت فلما استحكمت حلقاتها فرجت وكنت أظنها لا تفرج "

لم تفرج بعد . . ولكنني اشعر بأنها ستفرج قريبا

كم أحبك ربي . . فكم كنت حزينة ولجأت إليك فجعلت محل قلبي سرورا

اللهم إن كنت عندك شقيا فبقدرتك امحي واكتبني عندك سعيدا

. .

لو في يوم كان الحمل عليك تقيل

وتايه لوحدي مش لاقي دليل

والهموم تخللي الليل طويل

وترميك في غربة ومرارة وويل

مد ايديك . . تلقاه دايما حواليك

هو الله قبلك حاسس بيك

لو في يوم خدتنا معاصي أو ذنوب

وخافت قلوبنا ما تقدر تتوب

وتشكي الروح

ومين بالسر ليه نبوح

ومين اللي يقدر يداوري من الجروح

مد ايديك تلقاه دايما حواليك

هوه الله قبلك حاسس بيك

قول يا الله . . اهدي ليا قلبي عشان اتوب

امحي الذنوب

اهديني للطريق . . نور لي الطريق

" إن شاء الله هتلاقي الطريق "

لتكوني سعيدة . . فقط ليوم واحد هو ( اليوم )

السلام عليكم ورحمة الله وبركاته

ما أريد فعله اليوم ( هو محاولة لإسعاد النفس ) بإذن الله

فقط لأضع بعض البريق ع يومي فتضفي علي سعادة لأعيش عيش السعداء

ادعو الله ألا تفشل . . فلتبقي دعواتي ( يارب ) زيح عني همي واجعل قلبي مقره سعادة ونورا

اللهم آمين

دعوني اناجي

السلام عليكم ورحمة الله وبركاته

ربنا الحي الرقيب يقبل العبد المنيب . . فهو رحمن مجيب للدعاء ومن دعاه

ربنا الهادي الودود فضله ملأ الوجود . . عفوه خيرا و جود فارتجي دوما رضاه

يااااااااااارب . . محتجالك أوي يارب

أنا تعبانة . . وزعلانة . . وأنا مبقتش أنا

بقعد الف الف الف وانسي المدونة . . ويوم ما ملاقيش حد جمبي اجي اشكي نفسي هنا

في المدونة المهجورة . . ديه ميزتها برضه إن محدش بيشوفها

ياتري فعلا ايه في دماغي وعايزة ايه ؟!

وهفضل لامتي مشتتة كده . . ربنا يسامح أي حد كان سبب في إني اوصل للحالة دي

أنا بعييييييييييييييييييييييييييييييييييييييييييييييييييييط

بجد يارب مش قادرة . . مش قادرة مش قادرة

تعبااااااااانة أوي . . وبرتعش . . يارب أنا خايفة حد يشوفني كده

وخايفة انام . . لأني مش عارفة انام

نفسي اكووووووووووون مبسوووووووطة . . وحشني أوي شكلي وأنا مبسوطة

وحشتني ضحكتي . . ووحشني هزاري البايخ . . وحشني طنطيتي

الساعة 6 إلا ربع صباحا ومنمتش من امبارح غير ساعتين

:( . . مش عاااااااااااارفة انام

( لا تندم ع الماضي لأنه انتهي . . ولا تقلق من المستقبل لأنك لا تعرفه . . أتريد أن تقضي حياتك بين الندم ع الماضي والقلق من المستقبل . . عش يومك كما تريد أن يكون . . فسعيد أو كئيب )

أنا بقول كده للمحبطين . . بس عمري ما تخيلت إني اقول لنفسي كده

أنا قلقانة أووووووووووووووووي . . يارب هدي سري . . وابعث في نفسي الطمأنينة

يارب أنا عارفة إن مفروض مش ايأس . . وإني المفروض اخذل الشيطان أعوذ بالله منه

أنا هحاول يااااااااااااااااارب . . ارجع تاني زي ما كنت

يارب يارب فك كربي . . وزيح عني همومي وغمي . . يارب خرجني من الحالة ديه

وطمنني . . فيه حاجات كتير في حياتي وحشتني

أحبــــــــــــــــــــــــــــــــــــــــــك ربي

دعوني أناجي مولا جليلا . . إذا الليل أرخي عليا السدول

نظرت إليك بقلب ذليل . . لأرجو به يا إلهي القبول

لك الحمد والمجد والكبرياء . . وأنت الإله الذي لن يزول

وأنت الإله الذي لم يذل . . حميدا كريما عظيما جليلا

تميت الأنام وتحيي العظام . . وتنشي الخلائق جيلا فجيل

عظيم الجلال كريم الفعال . . جزيل النوالي تنيل السؤل

حبيب القلوب غفور الذنوب . . تواري العيوب تقيل الجهول

وتعطي الجزيلا وتولي الجميل . . وتأخذ من ذا وذا وذاك القليل

خزائن جودك لا تنقضي . . تعم الجواد بها والبخيل

دعونا نناجي مولا جليلا . . إذا الليل أرخي علينا السدول

يارب . . لا إله إلا أنت سبحــــــــــانك إني كنت من الظالمين

هوه ممكن صديقة عمر تضحي بصديقتها ؟!!

السلام عليكم ورحمة الله وبركاته

الصداقة . . كنز لا يفني

الصديق . . وقت الضيق

شعارات . . نرفعها في الاعتزاز بأصدقائنا . . وطالما كتبت تلك الكلمات

اتذكر . . ما مضي

ع طول بتكلم عن الصداقة مع اللي اعرفه واللي معرفهوش . . وأقول دايما أكتر حاجة اعتز بيها الصداقة

واتكلم عن صديقاتي المقربات . . اللاتي هن اخواتي . . من لم يأتوا من بطن أمي

من وثقت بهن . . جلست معهن . . تشاجرنا وتصالحنا . . وكما يقولون " أكلنا عيش وملح مع بعض "

ومن المستحيل . . أن افترق باحداهن

ليس فراق عادي . . إنه فراق الأحبة . .

لا يمكنني أن اصدق إنها كادت أن تضحي بمركب صارت في البحر أعوام . . وذلك بناءا ع سوء ظن

لا اصدق . . إنها بعد أعوام وأعوام . . ظنت إنني ما عندي أخلاقيات

أكلنا سويا . . ضحكنا . . استمتعنا . . خرجنا . . . . وبعد كل هذا " لم تكن تعلم كيف تفكر صديقتها "

والأسوأ . . عندما تمنيتها أن تكن يوما ما زوجة لأخي . . يا الله . . كيف لها بسبب أمنيتي أن تتقطع صداقتنا

لما لم تفكر أنني لم أجد أروع منها زوجة لأخي . . أبهذا تنقلب الأحوال ؟!

وتزداد الطينة بلة . . بكلمات . . من الصعب أن يحملها المرء ع الكتفين

أن تهددني بعدما حدث ما حدث . . بأن لو شخص ما " عزيز عليها " علم بأنه حدثت مشكلة بيني وبينها . . سوف تنهي صداقتنا

ولكن هذه المرة حقيقة . . بعدما علمت بسوء الظن . . وأوقعتني بالظلم

يا الله . . تضع صداقتي في كافة . . ومعرفة الشخص الآخر " من كان بذرة المشاكل بيننا " بما حدث بيننا " في كافة "

لا أتخيل أنه يوم أن أفرح لن أجدها جانبي وأنا في أشد الحاجة إليها

لا أتخيل أنها لن تهاتفني ع هاتف منزلي


لا اتخيل أنني سوف أنتقل للعيش في مكان آخر ولن تحتضنني

لا استطيع أن أصف ما حدث البارحة . . فخسارة صديق وليس أي صديق . . لا احتملها

وفي النهاية لا يسعني سوي شكرها . . ع ما قدمت لي طوال فترة وجودنا ع مركب كنا نسميها الصداقة

شكرا لكي أختي وصديقتي . . أحبك في الله وسأظل أحبك . . ولن اتذكر إلا كل خير كان

وسامحكم الله . . يا من كنتم سبب فراقنا

يوم أن كنا صغارا . . كان في القلب أمل

كنا نلهو لا نبالي . . أينما كان الزلل

كانت الأرض نشيدا . . فيها ألحان الصبا

تسكب الألحان شعرا . . عبقريا لا يمل

ياتري كانت خيالا . . يوم كنا نمتطي

ظهر صنوان الأماني . . أم تراهل لم تزل

لو بطلنا نحلم . . " نموت "

السلام عليكم ورحمة الله وبركاته

.

.

كل واحد فينا عنده هدف . . بيسعي لتحقيقه طول حياته

فكرت لحظة . . أنا هنا . . وهدفي هناك . . طب ولما اوصله ( هيكون شعوري ايه ساعتها )

حسيت بحزن بسيط

وقعدت افتكر كل الأهداف اللي حققتها . . حزنت حزن بسيط برضه

بتبقي مغامرات لذيذة لما الواحد يقع ويقوم ويقع ويقوم ويقاوم ويعافر عشان يوصل هناك

يمكن لما بنتعب بنحس بفرح

أكيد لما نحس خلاص أوشكنا ع الوصول . . هنحس بقلق بسيط ونسأل نفسنا

لما اوصل هناك هعمل ايه تاني ؟

لكن بنرجع نفرح . . عشان أملنا في تحقيق هدف آخر أسمي وأكبر

عشان كده بنعيط من الفرحة . . لما ناخد بطولة . . أو ننجح . . أو في حفلة تكريم

أو تهنئة . . حتي الجواز

لو كل واحد فينا نفسه في بيت مستقل يكون متوج فيه

وكل واحد فينا يفضل يكتب في ليست مواصفات فارس الأحلام

ولما يتحقق . . وييجي يوم الزفاف والكل فرحان . . لكن من قبل الأم وابنها أو بنتها . . أبوها اخوها كده يعني

بيحزنوا حزن بسيط لمفارقة الشخص ده

بعد كده الزوجين يعزموا ع تحقيق هدف آخر ( تحقيق السعادة داخل الأسرة وتكوين أسرة صالحة )

تبدأ الأم تكافح من أجل تربية أبنائها تربية صالحة وإسعاد زوجها

والأب يحاول يضاعف جهده من أجلهم . . وكل من الأب والأم يقوم بدوره حتي ترسي السفينة إلي مقصدها

. .

"علينا ألا نيأس بعد تحقيق الأحلام .. وأن نحضر الأهداف التالية حتي لا نشعر بالفراغ"

ماذا بعد بلوغ القمة ؟!

اتعجب كثيرا لهؤلاء

من يحلمون بصعود قمم الجبال

من يعشقون هدف الصعود لافرست وغيره من القمم

من أجل ماذا ؟!

يري الكثير من المخاطر والوقوع والموت أمام عينيه

أهذا من أجل صورة يضعها تذكار ويقل لأبنائه ها أنا ذا صعدت ؟!

وخير مثال . . الشاب المصري عمر سمرة . . من استطاع تحقيق حلم استمر 12 عاما

إنها لقمة السعادة . . حين تشعر إنك تستطيع أن ترفع علم بلدك أعلي قمة افرست :)

. .

جنــــة

So Sad

In the name of ALLAH

I feel that I'm lonely in my life

I can't live better

and no one can help me , just I can ..

Alot of things are difficult and I can't say anything

I'm a cat in adark side

I'll cry to be relaxed

I hate my childhood

I hate it so much

Everybody told me that I'm child

In the first time , all says it's good , I like it

but nobody can endure me

I can't see my island what's beautiful

I can't see the light room

I can't see the right way

I want someone help me to walk in the right way

someone seeks to know how I think in my mind and help me to arrange all ideas

O , God

Help me to break these problems

محتاجة ادلعها

بسم الله توكلت ع الله

جنتي متضايقة النهاردة . حيرانة في ألف فكرة ودماغها عمالة تودي وتجيب

يبقي ندلعها . . ننعنشها . . ونفرفشها . . ونديها حقها

هعمل معادلة لذيذة توصلني لفكرة مثيرة

من وجهة نظري الشخصية إن سر السعادة في الرضا

رضا الله ورضا الوالدين ورضا النفس

وإن ده هيتحقق لما نعمل موازنة بين الروح والجسد والعقل

و ع طول الواحد بيفشل في إنه يعمل المعادلة دي . . فبيبقي بكل صراحة (( مقصر ))

الروح نغذيها بالأعمال الروحانية

الجسد . . نهتم بالصحة اللي ادهالنا ربنا سبحانه وتعالي أمانة ونخليها زي البمب

العقل . . سره في كلمة " اقرأ "

حطينا الخطة كالعادة في الموازنة . . ولكن المرة دي حطيتها أنا وجهاد وهنمشي عليها بإذن الله تعالي من يوم السبت الجاي

يارب صبرنا وقوينا

حكاية الفوربي . . أنا جوايا أصلا عايزة اسيب بصمة ليا في الجامعة

فلما لقيت التييم كويس وكده قولت ادخل فيه واسيب البصمة . . بس مقلقة . . وحاولت اخللي حد يقنعني

بس للأسف كل الكلام بتاعهم عارفاه . . امممممممم أو غالبا محدش عارف يدخللي من الناحية اللي ممكن تقنعني

وساعات بحس مش عايزة اتعرف ع ناس من خلال الفرق . . وحاساهم كلهم فهموني غلط علشان ترددي

وخايفة أصلا ديه تكون غلطة . . وتجيب غلطات . . خاصة إني حاسة بتأنيب ضمير اليومين دول

والواحد لما ييجي يحاسب نفسه يفتكر الغلط صح ويبني عليه

طب افكر بتعمق أكتر . . علشان أوصل لقرار أكيد

أنا عرضت عليهم اعمللهم أي حاجة يحتاجوها من غير ما اكون ميمبر . . بس أسلوب الرد بصراحة مكانش لطيف

بيقولوا في الفوربي البنات بمية راجل . . بس أنا مش حاسة إني بمية راجل لسبب . . الوقت اللي هقضيه عندهم . . هيبقي فيه حاجات تانية أولي

خاصة إني بعمل موازنة . . فهيبقي أولي بيا بيتي . . ودراستي . . علاقتي بربنا وبصحتي وبدماغي

وإن كان ع البصمة اللي عايزة اسيبها في الجامعة . . فأنا برضه هعرض عليهم خدماتي

وهدور ع فكرة من أفكاري تخليني فعلا اسيب حاجة فيها قبل ما امشي . . تتكتبلي عند ربنا

مش حابة اروح ناحية الفوربي . . وهقضي الوقت في المكتبة أحسن . . واعيد تصميم الفيجن والميشن بشكل أفضل

وهركز أكتر علي أسرتي الحالية والمستقبلية واحاول أسعدهم قدر الإمكان

حاسة الصورة بتعبر عني . . هدلعها خلاص . . والونها . . اديها بريق . . وشوية برونز

هحس في الحر الدنيا برد . . واجدد حياتي يوم بيوم

ابتسم . . فالرائع سيكون أروع

لا تقلقي جنتي . . ما دام الأمل في طريقك . . تنظرين إليه وتعافرين . . بلا يأس

وما دامت الابتسامة في طبعك . . ظأططي :)

كل له دائرته

السلام عليكم ورحمة الله وبركاته

دائرة الصداقة - دائرة الصحوبية - دائرة الزمالة - دائرة المعارف

ديه الدواير اللي في حياتي وكل واحدة وليها أسسها

الصداقة عندي معناها كبير جدااا . . والبنات اللي في الدايرة دي قليلة وهن صديقاتي منذ زمن بعيد

ياما لعبنا وعيطنا . . اتخاصمنا واتصالحنا . . فرحنا وزعلنا . . واتنافسنا . . وبنزور بعض دايما

ولو حد فينا مشافش التاني من مدة . . بنقول عنده ظروف ولما تتحل هنتقابل . . وبيحصل

آية الله + آية سعيد ( ساكنين جمبي وأقرب ما يكون إلي قلبي . . وليا مواقف معاهم من ابتدائي واعدادي .. الخ )

ويوم ما ادخل بيتهم احس بيتهم فرحان . . باباهم ومامتهم واخواتهم . . بحس كأنه بيتي

حنان شوقي . . ( صديقتي الصدوقة من ثانوي . . نفسنا نوصل للوزن المثالي فعلي طول نمشي

بس بما إن حنان هندسة فمضغوطة ع الآخر ومش بنمشي كتير . . بحب حنونتي أوي )

جهاد محمد . . ( من أولي جامعة عرفتها . . شيماء سعيد عرفتني عليها في الدفعة وأنا وشيماء كنا قريبين من بعض ولما حولنا جامعة القاهرة وكنسلت التحويل ورجعت . . اتعرفنا أنا وجهاد ع بعض أكتر وبقت قريبة مني جدا جدا جدا وعرفتها ع والدتي )

دول صديقاتي

الصحوبية . . كتير ومميزات . . ومادام صحبة خير فتوكلنا ع الله . . وليهم مكانة كبيرة عندي . . في منهم في دفعتي . . أو في الدار . . أو كورسات . . أو قوافل . . الخ

الزمالة . . زميلاتي في المدرج . . في الدار . . في كورسات . . كده يعني

المعرفة . . واحدة اتعرف عليها وتعلم فيا أو اعلم فيها . .

ومينفعش نمشي من غير ما نديي لبعض الكونتاكتس علشان نتواصل

هنا بقي تحصل المشكلة

في كتير بيبقي نفسهم تكمل المعرفة ونتواصل دايما . . فأنا لسبب ما أقولها مش ينفع بطريقة لطيفة يعني

وهكذا في الباقي

حاليا بقي لي صاحبة . . عايزة تدخل منطقة الصداقة عندي . . ويمكن زعلانة علشان بتشوفني مع جهاد ع طول

أنا بحب صاحبتي ديه وكل حاجة واكتشفت جواها أبيض بطريقة رهيبة

وبتقوللي إني قافلة ع منطقة الصداقة ومش سامحة لحد يدخلها أبدا

وكلامها صح فعلا . . لأن أنا فعلا مش بحط عيني ع واحدة وأقول عايزاها تكون صديقتي

احنا أكيد في الأول كان معرفة فعشرة وحاجات كتيييييير يمكن تاخد سنين

أنا حيراااانة أوي . . لأني لو مكان هاجر وقولت لواحدة نكون أصدقاء فردت عليا إنه صعب وفهمتني وجهة نظرها

أنا أكيد هتجرح . . أنا بقي حاسة إني هاجر مجروحة مني . . ومش عارفة اعمل ايه خالص

هاجر نفسها زي ما أنا مع جهاد . . اكون معاها كده . . بس أنا فعلا لما بنزل من البيت لغاية ما برجع

ببقي يادوب اقضي مصالح . . احضر محاضراتي . . وبحاول اعوض صحباتي أو الناس اللي اعرفهم قدر الإمكان

وعارفة يمكن اكون مقصرة معاهم . . اهئ اهئ بقي

A friend in need is a friend indeed

كان حلم وهمــي وأنا صدقت

السلام عليكم ورحمة الله وبركاته

هوه ده أنسب مكان فعلا افضفض فيه . . ع الأقل هنا بيستحملني

في الآونة الأخيرة حاسة حياتي بقت كلها مشاكل

مشاكل غريبة معقدة . . نفسي تتحل

أكيد الحل ( اقطع عرق واسيح دم )

بيتهيألي الواحد لو غير مبدأ من مبادئه من البداية . . هتقلب عليه في النهاية

نفسي أكون أقوي من كده :)

اه عندي قوة تحمل رهيبة . . بس لما بستسلم بكون أضعف ما يكون

يا الله . . حاسة مش عارفة اكتب حاجة . . حاسة كل ما افرح ( الفرحة بتتاخد مرة واحدة كده )

حاسة إني دخلت في دوامـــــــة

بقيت حاسة ( اتخنــقت وطلعت كنت بضيع وقت ) زي مطب صناعي

أكيد أنا السبب . . خليني في السليم . . علشان مش اتعب

ما ع رأي فريد ( الحياة حلوة ) . . وطول عمري فعلا بصالها بنظرة حلوة

هاجي اخيب دلوقتي ليه . . يمكن مش عارفة ايه سبب اللي أنا فيه ده

بس محتاجة اقف ادام المراية . . واشوف نفسي كويس . . من غير النضارة . . عشان افهم

ومحتاجة ابعد كتير . . مقربش . . ما الواحد لو قرب ( هتيجي فوق دماغه )

وأنا مش احب أخد فوق دماغي

نفسي ارتــــــــاح . . (( نفسيا ))

والحل بسيط ( اسيبها ع الله ) . . واقول يـــــــــــــارب

فلا تقل عندي هم كبير . . ولكن لي رب كبيــــــر

بس أنا حاسة محدش هيخليني فرحانة غير أنا . . ايوة أنا

لو حد طلع حد من خنقته . . ففرح . . هيفرح حبة . . وتزول الفرحة

لكن لو الواحد طلع نفسه من الخنقة بنفســــه . . تأثيرها أقوي

حتي لو كانت طالت خنقته . . بس كان هيبقي عامل فعال

أنا متضــــــــــــــايقة أوي يارب . . وغلطانة . . وحاسة بصراع داخلي . . وحاسة بحاجات كتير غريبة أوي

يارب . . فك كربي ويسر لي أمري . . وانزع همي . . واجعل مقره السكينة . . وارزقني السعادة دائما وأبدا

يوم مع أميرة حمدي

السلام عليكم ورحمة الله وبركاته

وحشتيني يا مدونتي . . وجيت اسجل فيكي ذكري حلوة . . بدون كسل

النهاردة 22 فبراير 2010 . . وأول يوم انزل فيه الجامعة في بداية الترم التاني

كان فيه محاضرتين واحدة من 8 : 11 والتانية من 2 : 5

وأنا قولت بقي أول مرة الدكاترة تدخل فنزلت متأخر شوية ووصلت المدرج 9 إلا ربع

كانت الدكتورة داخلة من 8 ونص . . وقافلة الباب . . بس اتحشرت وسط بنات لسة داخلين بقي

وشوفت بقي صحباتي واتبسطت أوي

جهاد . . صديقتي الصدوقة

إسراء وهاجر . . صحباتي . . جهاد بعد المحاضرة راحت فريق الفوربي

وأنا وهاجر وإسراء ومعانا مها صاحبة نهي صاحبتي وحبيبتي في الله . . قعدنا سوا قعدة عرب ادام السنتر وطلعنا أنا ومها جبنا أكل وكلنا

أنا وإسراء وهاجر نزلنا ع حلوان عشان أنا عايزة اشتري تحجيبة . . ومش لقيت حاجة عجباني . .

وأنا في المول اتصلت بيا أميرة حمدي . . مش سمعتها وقولتلها هتصل بيكي كمان شوية

نزلنا واتصلت بيها لقيتها يعتبر جمبي بدقيقة واحدة

جاتلي عند هههههههه ( ميس حلوان ) ده كان الملتقي . . بجد أول ما شوفتها طيييييييرت من الفرحة

وعرفتها ع صحباتي وجيت اعزمها ع عصير قصب مش وافقت عشان عصير القصب مش يحبها

فعزمت هاجر وإسراء بقي

وجات معانا الجامعة وكانت هتحضر المحاضرة معانا

المهم قعدنا بقي مستنيين المحاضرة والدكتور مش جيه

وطبعا لازم اخد ذكري من أميرة كل ما اشوفها . . فكتبتلها ورقة ( مضمونها حاجة خاصة بيها )

ورسمتلها رسمة ( بنوتة شكلها يضحك وقعدت الون فيها علشان يبقي اهداء حلو بقي )

هههههههه هاجر نامت ادامنا فصورتها . . وكانت عمالة تتحايل عليا ابعتلها الصور اللي اتصورناها آخر يوم في الامتحان سوا

فضحكت مع أميرة وإسراء وقولتلهم لما اروح هكتبلها ميل عنوانه ( الصور ) تدخل تلاقي صورها وهيه نايمة

بس وآسفـــــــــاه . . هاجر لما كانت بتصورني أنا وأميرة وقعدت تشوف الصور شافت صورها ههههههههه

قعدت تهزقنا وتقول معقول يا جماعة شكلي وحش كده وأنا نايمة طب مش تقولولي . . ومسحت الصور يا خسارة

جهاد بقي رجعت وأول ما جات أميرة قالت دي جهاد . . علشان حكيتلها عنها

قعدت بقي . . ولقيت إسراء وهاجر عايزين يمشوا وعايزينا نقوم . . فأنا اتضايقت من جوايا

علشان شكل هاجر اتضايقت علشان مش عايزة اقوم

وفي نفس الوقت أميرة جات الجامعة مخصوص عشاني وفي الآخر نمشي

ولما مش وافقت وشكل هاجر اتضايقت راحت أميرة قالت استنوا يا جماعة هنمشي معاكم ( مع إن هنمشي معاكم ديه يعني لغاية باب الجامعة وإسراء وهاجر طريق وأنا وأميرة طريق عكسهم )

المهم أنا قولت لجهاد بشويش اتضايقت ومش عارفة اركز . . كنت ساعتها بلون الرسمة ففجأة لقيتني ماسكة ألوان غريبة

وخليت جهاد تاخد هاجر ع جمب وتفهمها حتة ذوقية

هههههههههه لقيت هاجر بعدها جاية . . خلاص يا جماعة نستأذن احنا بقي

هما مشيوا وفضلت أنا وأميرة وجهاد . . خلصت الرسمة واديت الذكري لأميرة . . وقعدنا نتصور بقي

هههههههه وكنا عايزين صورة تجمعنا احنا التلاتة سوا

فبقولهم هقول لبنتين قاعدين في الجنينة . . فروحت اقولهم . .

السلام عليكم . . ردوا عليا

ممكن يا جماعة اصوركم :) دعابة دعابة

لقيت بنت منهم أصلا من زمايل ثانوي قعدنا بقي بوس وأحضان وصورتنا بقي

هههههههههههه وكان فيه فرخة أم دم خفيف عاجبة أميرة أوي فطول ما احنا ماشيين كل شوية نتصور معاها

وشوية نتصور مع بينوكيو . . أو مع الرسمة بتاعة البنوتة

وقعدنا ع السلم أنا وأميرة وخليتها تكتبلي ذكري ( كلامها كان حلو أووووووي . . لما فتحتها في البيت حبيت أميرة أكتر )

روحنا بقي . . وعند موقف الميكروباصات حكيتلها الفيلم الوثائقي بتاع البطاريق :) وركبتني وركبت

_______________

يوم جميــــــــــــــــــــــــل جدا . . الحمد لله الذي رزقني بالصحبة الصالحة

يارب ديمها عليا

واجمعني بكل الناس اللي بحبها أعلي الجنة عند الحبيب المصطفي صلي الله عليه وسلم

_________________

كلمة ...

النهاردة أول مرة اكتشف في هاجر (( إن قلبها نقي )) . . عشان كنت جبتلها هدية كمحبة عبارة عن نوت إسلامية كده

فلما كانت بتدفع أجرة الميكروباص شاورتلي جوة شنطتها عليها وهيه مبتسمة

فقولتلها ممكن اشوفها . . قالتلي اتفضلي . . شوفتها بقي أنا وإسراء

لقيتها كاتبة يوم بيوم عملت ايه وايه فرحها وايه زعلها

لقيتها أيام الامتحانات كانت تدخل تقول مبسوطة أوي عشان كلمت إيناس النهاردة واتطمنت عليها هيه وإسراء وشيماء

وبتقعد تكتب عن الصحبة الصالحة . . ولما تصالح باباها لو زعل . . ولما تخرج خروجة مع مامتها وترجع مبسوطة

ولما خالتها جابتلها مج هدية فطارت من الفرحة

يعني . . اعتقد غالبا مفيش ناس زي كده كتير . . أنا برضه بكتب كده وبجمع أحلي ذكريات في حياتي علشان بحب استعيدها وابقي في موود سعادة مطلقة

_________

ههههه النهاردة حكيت لهاجر وإسراء عن مفهومي للصداقة والصحوبية والزمالة والمعرفة

وإنهم في دايرة الصحوبية ههههههههه فبتقول نحمد ربنا إنك حطانا فيها

( هيه هاجر نفسها تكون صديقتي )

بس أنا دايرة الصداقة ديه حواليها حصون قوية . . لو قدرت تدخلها أكيد هفرح . . بس هيه وشطارتها بقي . . والشاطرة تغزل برجل حمارة :)

__________

بقالي فترة مش عارفة اقابل أميرة . . أميرة بكالوريوس هندسة وعرفتها في قافلة تبع جمعية رسالة

كانت قاعدة ادام في الباص وأنا وآية الله صديقتي الصدوقة قاعدين وراها

وكان فيه ورقة بتنقلها مكتوب فيها نوايا كتير علشان الواحد يفتكرها ويجدد النية

وأنا واقفة فوق راسها عمالة اقول عايزة انقلها وقعدنا نناكش في بعض وفجأة اتعرفنا

وإلي يومنا هذا مفيش مرة تعدي إلا ونناكش في بعض هههههه زي الفراخ أم دم خفيف

. .

أنا بحب أميرة أووووووووي . . ونفسي نفضل نتقابل ونسأل ع بعض دائما وأبدا . . وربنا يجمعني بيها هيه وكل أحبابنا في الآخرة

. .

أميرة كان نفسها تفضفض باللي خانقها . . بس كان في حاجة بتحوشها . . بس أنا حاسة لو حكيتلها سر في حياتي

ممكن الاقي الحاجز انكسر . . وهتقدر تفضفض عادي . . ريللي شخصية محترمة جدا وهروحلها بإذن الله هندسة في أقرب فرصة واعرفها ع حنان صديقتي الصدوقة التالتة . .

ههههههههه مش عارفة . . نفسي يبقي معايا فلوس كتير واجيب لكل الناس هدايا

أنا بحب اهادي الناس أووووووي . . يارب يارب أنا مبسووووووطة أوي . . ديمها عليا

كان يوم صعب

السلام عليكم ورحمة الله وبركاته

امبارح يوم الجمعة 22 يناير 2010

نزلت الصبح كان عندي مراجعة في حدائق المعادي

وع طول بركب سيدات . . المرة دي بقي . . كان الباب هيقفل خلاص وأنا متأخرة

وكده كده الساعة 9 إلا تلت صباحا فقولت مش هيكون فيه ناس كتير

ركبت بقي من هنا والباب قفل ع طول

وفضل ماشي من حلوان ماشي ماشي . . قولت هنزل عين حلوان واركب سيدات

فلقيت كده كده مفيش ناس وكسلت انزل واهوه كام محطة واوصل

هاه . . طلعت الكرانشي علشان أكل . . وقلعت الجوانتي من ايدي

كلت وخلصت وجيت البس الجوانتي . . الخاتم وقع ع نفس الكنبة ومش خدت بالي

وسمعت صوت دحرجة قولت أكيد حاجة وقعت من الراجل اللي جمبي

فالراجل بص أحسن يكون حاجة وقعت ( بس بصة بعدم اهتمام ) ومخدش باله

ونزل محطته

والمترو وصل المعادي . . راجل فلاح ولابس جلبية كان في الكنبة اللي ادامي

فجأة قام وقعد جمبي وحسيت ايده بتاخد حاجة

فقلقت وقومت ع طول ( في بالي شكله حرامي وكده )

ونزلت ع طول حدائق المعادي

وأول ما وصلت السنتر . . وقعدت . . مش لقيت الخاتم الدهب في ايدي

( صدمــــــــــة )

قولت في بالي ممكن نسيته في البيت

فافتكرت اللي حصل بقي وقعدت زعلانة أوي

ومش فهمت حاجة في المحاضرة

ومن كتر الضغط النفسي بكيت وقعدت اداري في دموعي عشان لا المستر ولا حد ياخد بالهم

الخاتم عزيز عليا بقي ( لأنه هدية من الغالية والدتي )

وصعب عليا ازاي حد يقبل ع نفسه ياكل من حرام

روحت البيت ومش عارفة هقول لوالدتي ازاي

قعدت جمبها كانت بتعمل محشي

وبشرب مياة ومبتسمة . . وبسألها ( أمي هوه أنت اتسرقتي قبل كده ؟! )

قالت لا : ليه وايه فيه ايه وووو

وعمالة تقوللي المحفظة اتسرقت . . طب الملزمة . . الفلوس طب طب طب وأنا اقولها يارييييييييت

قولتلها الخاتم بقي . . وقعدت تزعق تزعق بقي ويعني بكرة ممكن شبكتك تقع منك بقي

واخويا جيه عمال يضحك وزي أما يكون شمتان ويضححححك

وأنا اعيييييييييط

واخويا التاني بقي عمال يتريق وبابا ( عليه العوض )

والحمد لله اليوم عدي امبارح ع خير

وحسبي الله ونعم الوكيل

ولغاية دلوقتي مش قادرة اتخيل حد يرضي ياكل من حرام :'(

Bad News

السلام عليكم ورحمة الله وبركاته

الواحد بيفتح الجورنال بيجيله حالة اكتئاب

زعلت أوي ع الجندي المصري الشهيد أحمد شعبان . . اللي أصابته رصاصة ع الحدود

آخر واحد من أصحابه كلمه . . كان قبل ما يطلع برج المراقبة وبيقوله :

خلاص بقالي 50 يوم واتجوز يا باشا

ياااااااااه . . وكان أهله عمالين يجهزوله حاجته

الخبر جالهم ووالدته فقدت النطق :(

قال تعالي : (( ولا تحسبن الذين قتلوا في سبيل الله أمواتا بل أحياء عند ربهم يرزقون ))

. .

زعلت أوي ع اللي حصل في نجع حمادي . . ناس ماتت

عسكري ( مسلم ) ومسيحين وفيه مصابين مسلمين ومسيحين

ليــــــــه بجد

بيقولوا السبب ( شاب مسيحي اغتصب فتاة مسلمة )

صعبــــــــــة أوي

. .

كل يوم أخبار كده . . من كام يوم ترام مصر الجديدة دهس مهندس متزوج ولديه أبناء

واديها بقي في أخبار الحوادث

واديها في الأمراض اللي كل شوية تظهر

واديها في الناس اللي مش عايشة أصلا

............................

قال تعالي : (( ظهر الفساد في البر والبحر بما كسبت ايدي الناس ليذيقهم بعض الذي عملوا لعلهم يرجعون ))

لعلهم يرجعون . . يعني في فرصة نصلح . . كتير بدأوا بالفعل . . بس كتير برضه مستمرين في التخريب

يارب اهدينا واهديهم

قال تعالي : (( واتقوا يوما ترجعون فيه إلي الله ثم توفي كل نفس بما كسبت وهم لا يظلمون ))

الآية ديه آخر ما نزل من القرآن , وعاش صلي الله عليه وسلم بعدها تسع ليال ثم انتقل إلي الرفيق الأعلي

ياااااه . . ربنا وصانا بالاصلاح والتقوي . . علشان ينجينا من عذابه وسخطه

واحنا لســـــــــــــــ ( بنعصيه ) ـــــــــــــة

. . حل كل مشاكلنا في الكلمة ديه ( تقوي الله ) . .

نتقي الله في العبادة والسنن وصلة الأرحام وبر الوالدين والصدقة والإحسان إلي الأرملة واليتيم

في كف البصر وحفظ اللسان . . في الوفاء . . في صحبة الخير . . في حفظ السمع . . في المعاملة الحسنة . .

في التبسم . . في وفي وفي وفي كل حاجة

( كلها أخلاق حسنة يتحلي بها المسلم )

" ومن يتق الله يجعله له مخرجا "

فاعمل لدنياك كأنك تعيش أبدا , واعمل لآخرتك كأنك تموت جدا

ولا يغرنك طول الأمل , فالموت يأتي بغتة

فالكيس من دان نفسه وعمل لما بعد الموت . . والعاجز من دان هواه وتمني ع الله الأماني

اللهم اصلح أحوالنا . . وحشن أخلاقنا . . و ارزقنا حسن الخاتمة

فجر الإسلام

السلام عليكم ورحمة الله وبركاته

دي كانت الحضانة اللي أنا فيها زمان . . (( حضانة فجر الإسلام )) قريب من بيتي

قضيت فيها أحلي ذكريات حياتي فعلا

أغلب صحباتي اللي كانوا معايا فيها لسة لغاية دلوقتي بنكلم بعض وبنقابل بعض

كان في بنوتة اسمها ( نورهان ) صديقة الطفولة . . بحبها جدا جدا جدا . . وكنا يوم ما نزعل مع بعض هههههه نقلب أعداء

شوفت والدتها زمان ( الله يرحمها ) وشوفت أهلها

وكانت دخلت مدرسة غير اللي دخلتها

ومبقناش نشوف بعض

وعزلت كمان . . فكله رااااااااح . . كنت بشتاقلها كتير ونفسي أشوفها . . ومعرفش هيه فين ولا رقم تليفون ولا أي حاجة

لغاية ما سبحان الله عدت سنين كتير . . وكان من حوالي سنة ونص روحت احضر درس علم في المسجد

وكنت لوحدي . . صليت المغرب وبعد التسليم

شوفتها بتصلي في نفس المسجد . . لدرجة جوايا متردد هيه ولا لا

لقيتها هيه . . وصلت لقمة السعادة ساعتها . . عرفت أنها دخلت علوم . . وادتني أرقامها وكده

كمان أسبوعين كده ظبطنا خروجة أنا وصحباتي لدار أيتام

فالطبيعي الواحدة مننا بتجيب بنات صحباتنا مش يعرفوهم وبنتعرف ع بعض وكده

لقيت أنتيمتي آية الله بتقوللي في بنت اسمها نورهان عسل خالص ومحترمة جدا هتيجي معانا وهعرفك عليها

نزلنا بقي يوم الخروجة نتقابل في الموقف

طلعت نورهان ( صديقة الطفولة ) أنا وهيه حضننا بعض أوي وآية واقفة مبلمة

تعرفوا بعض ازااااااااااااااااااااااااااااي ؟!

حكينالها بقي

ديه نورهان

_______________

من الناس اللي فقدتهم فعلا ونفسي أشوفها كانت بنت اسمها ( سمر )

كانت والدتي كل يوم الصبح وهيه رايحة الشغل توصلني لغاية المكان اللي بنتقابل فيه أنا وسمر

ونروح الحضانة سوا

سمر كانت والدتها بتعملها ضفيرة سايبة

وأنا ماما كانت بتعملي ضفيرة قوية :]

كنت نفسي أنا وسمر نبدل . . هيه نفسها تبقي قوية وأنا نفسي تبقي سايبة

سمر عزلت واحنا في حضانة . . كنت مش اعرف رقم بيتي عشان اطلب رقمها

بقالي كام يوم نفسي أشوف سمر . . بفكر اروح العمارة اللي كانت ساكنة فيها

واشوف لو حد ليه علاقة بأهل سمر يديني رقمهم

نفسي اعرف دخلت كلية ايه . . سكنت فين . . عملت ايه في حياتها اللي فاتت

ياتري عقليتها بقت عاملة ازاي . . وحشاني أوي . . وياتري هتفتكرني ؟!

هههههه هبقي عاملة زي غادة عادل في فيلم ( في شقة مصر الجديدة ) لما كانت بتدور ع الميس بتاعتها

___________

وفاكرة لما اكتشفوا فيا موهبة الرسم ع ايد ميس سلوي

فاكرة كمان شكل الترابيزات وهيه مرصوصة . . وفاكرة محمد اخويا كان قاعد هناك

وكنت حافظة من القرآن كتير . . وبيطلعوني في الحصص الفاضية اقول اللي حافظها

قولت أسماء الله الحسني وسور كتير

واخويا عمال يشاورلي ( عايزني اقول سورة الكوثر ) . . كان حافظها هيه بس عشان صغيرة :)

___________

فاكرة استاذة غادة . . وكانت بتتكلم هيه ووالدتي كتير . . هههههههه

ههههههههههه فاكرة ماما لما كانت بتعملي سندوتشات بيض . . والبيض مش كان بيحبني . . عامل زي اللبن معايا دلوقتي

وباكلها بالعافية

وفي حصة استاذة غادة كنت باكل السندوتشات

فاكرة المراجيح والزحاليق . . وفاكرة الواد اللي دراعه اتكسرت بسببها :)

___________

ههههههه فاكرة لما اتخانقنا مرة أنا ونورهان . . سلطت ولد اسمه محمود عليا

ههههههه عضيته في ايده وجابت دم واستاذة سلوي زعلت مني وقالت هتقول لأهلي

___________

بالمرة بقي فاكرة في 4 ب . . ولد كلمني في الفصل ( اسمه أحمد رمضان ) . .

قولتله مش تكلمني عشان والدي قال مش اكلم ولاد

رزل عليا

قولتله هضربك . . قاللي اضربيني

ههههههههه وأيامها كنت بتمرن مصارعة بقي

قولتله قوم . . قام . . مسكت رجليه اليمين وشنكلت الشمال برجلي . . حركة مصارعة بقي

الواد وقع ودماغه اتخبطت في الحيط وقعد يعيييييييييييط . . وأنا اطبطب عليه

واستاذة ماجدة حامد زعلت مني وقالتلي مش كنت اتخيل يطلع منك كده هههههههه كان في حصة الصيانة

_____________

قلبت ع شر . . ومرة برضه وأنا في 4 ب . . كان محمد في أولي اعدادي

كان عايز يدخل الحمام في المبني . . والعيال اللي معايا في الفصل موقفينهم أمن ع المبني مش عايزين حد يدخل في الفسحة

فقلبت خناقة بين اخويا . . وولد اسمه محمود عبد الهادي

أنا بقي اييييييه اخويا بيتخانق

هههههههههه دخلت اضرب في الواد هوه وأصحابه وروحت اشتكيت للميس وقرصتهم من ودانهم . .

واخويا عاتبني ساعتها وقاللي لما تشوفيني بتخانق بعد كده مالكيش دعوة

ههههههه من ساعتها بيبقي ادامي بيتخانق بقعد اتفرج عليه

_____________

ههههههههههه فاكرة مرة في 1 اعدادي . . ربنا يسامح اخويا

كان هوه في 3 بقي . . كنا بناخد مجموعة عند أ / سيد عبد الحميد ( دراسات اجتماعية )

وكان بيبقي في نفس اليوم . . مجموعتي الأول وبعدين اخويا

غاب المستر في يوم

رجعت بهزر مع اخويا . . مستر سيد غاب علشان مراته خلفت وجابت ولد سموه ع اسمك محمد

ههههههههههههه تاني يوم لقيت المدرسة كلها بتقول كده

والمستر بيناديني من الفصل بتاعي . . هههههه لقي مصدر الأوشاعة ههههههههه

مراته كانت في السابع باين

هههههههههه ده جزاء اللي يهزر مع اخواته

كفاية كده بقي