Bad News

السلام عليكم ورحمة الله وبركاته

الواحد بيفتح الجورنال بيجيله حالة اكتئاب

زعلت أوي ع الجندي المصري الشهيد أحمد شعبان . . اللي أصابته رصاصة ع الحدود

آخر واحد من أصحابه كلمه . . كان قبل ما يطلع برج المراقبة وبيقوله :

خلاص بقالي 50 يوم واتجوز يا باشا

ياااااااااه . . وكان أهله عمالين يجهزوله حاجته

الخبر جالهم ووالدته فقدت النطق :(

قال تعالي : (( ولا تحسبن الذين قتلوا في سبيل الله أمواتا بل أحياء عند ربهم يرزقون ))

. .

زعلت أوي ع اللي حصل في نجع حمادي . . ناس ماتت

عسكري ( مسلم ) ومسيحين وفيه مصابين مسلمين ومسيحين

ليــــــــه بجد

بيقولوا السبب ( شاب مسيحي اغتصب فتاة مسلمة )

صعبــــــــــة أوي

. .

كل يوم أخبار كده . . من كام يوم ترام مصر الجديدة دهس مهندس متزوج ولديه أبناء

واديها بقي في أخبار الحوادث

واديها في الأمراض اللي كل شوية تظهر

واديها في الناس اللي مش عايشة أصلا

............................

قال تعالي : (( ظهر الفساد في البر والبحر بما كسبت ايدي الناس ليذيقهم بعض الذي عملوا لعلهم يرجعون ))

لعلهم يرجعون . . يعني في فرصة نصلح . . كتير بدأوا بالفعل . . بس كتير برضه مستمرين في التخريب

يارب اهدينا واهديهم

قال تعالي : (( واتقوا يوما ترجعون فيه إلي الله ثم توفي كل نفس بما كسبت وهم لا يظلمون ))

الآية ديه آخر ما نزل من القرآن , وعاش صلي الله عليه وسلم بعدها تسع ليال ثم انتقل إلي الرفيق الأعلي

ياااااه . . ربنا وصانا بالاصلاح والتقوي . . علشان ينجينا من عذابه وسخطه

واحنا لســـــــــــــــ ( بنعصيه ) ـــــــــــــة

. . حل كل مشاكلنا في الكلمة ديه ( تقوي الله ) . .

نتقي الله في العبادة والسنن وصلة الأرحام وبر الوالدين والصدقة والإحسان إلي الأرملة واليتيم

في كف البصر وحفظ اللسان . . في الوفاء . . في صحبة الخير . . في حفظ السمع . . في المعاملة الحسنة . .

في التبسم . . في وفي وفي وفي كل حاجة

( كلها أخلاق حسنة يتحلي بها المسلم )

" ومن يتق الله يجعله له مخرجا "

فاعمل لدنياك كأنك تعيش أبدا , واعمل لآخرتك كأنك تموت جدا

ولا يغرنك طول الأمل , فالموت يأتي بغتة

فالكيس من دان نفسه وعمل لما بعد الموت . . والعاجز من دان هواه وتمني ع الله الأماني

اللهم اصلح أحوالنا . . وحشن أخلاقنا . . و ارزقنا حسن الخاتمة

فجر الإسلام

السلام عليكم ورحمة الله وبركاته

دي كانت الحضانة اللي أنا فيها زمان . . (( حضانة فجر الإسلام )) قريب من بيتي

قضيت فيها أحلي ذكريات حياتي فعلا

أغلب صحباتي اللي كانوا معايا فيها لسة لغاية دلوقتي بنكلم بعض وبنقابل بعض

كان في بنوتة اسمها ( نورهان ) صديقة الطفولة . . بحبها جدا جدا جدا . . وكنا يوم ما نزعل مع بعض هههههه نقلب أعداء

شوفت والدتها زمان ( الله يرحمها ) وشوفت أهلها

وكانت دخلت مدرسة غير اللي دخلتها

ومبقناش نشوف بعض

وعزلت كمان . . فكله رااااااااح . . كنت بشتاقلها كتير ونفسي أشوفها . . ومعرفش هيه فين ولا رقم تليفون ولا أي حاجة

لغاية ما سبحان الله عدت سنين كتير . . وكان من حوالي سنة ونص روحت احضر درس علم في المسجد

وكنت لوحدي . . صليت المغرب وبعد التسليم

شوفتها بتصلي في نفس المسجد . . لدرجة جوايا متردد هيه ولا لا

لقيتها هيه . . وصلت لقمة السعادة ساعتها . . عرفت أنها دخلت علوم . . وادتني أرقامها وكده

كمان أسبوعين كده ظبطنا خروجة أنا وصحباتي لدار أيتام

فالطبيعي الواحدة مننا بتجيب بنات صحباتنا مش يعرفوهم وبنتعرف ع بعض وكده

لقيت أنتيمتي آية الله بتقوللي في بنت اسمها نورهان عسل خالص ومحترمة جدا هتيجي معانا وهعرفك عليها

نزلنا بقي يوم الخروجة نتقابل في الموقف

طلعت نورهان ( صديقة الطفولة ) أنا وهيه حضننا بعض أوي وآية واقفة مبلمة

تعرفوا بعض ازااااااااااااااااااااااااااااي ؟!

حكينالها بقي

ديه نورهان

_______________

من الناس اللي فقدتهم فعلا ونفسي أشوفها كانت بنت اسمها ( سمر )

كانت والدتي كل يوم الصبح وهيه رايحة الشغل توصلني لغاية المكان اللي بنتقابل فيه أنا وسمر

ونروح الحضانة سوا

سمر كانت والدتها بتعملها ضفيرة سايبة

وأنا ماما كانت بتعملي ضفيرة قوية :]

كنت نفسي أنا وسمر نبدل . . هيه نفسها تبقي قوية وأنا نفسي تبقي سايبة

سمر عزلت واحنا في حضانة . . كنت مش اعرف رقم بيتي عشان اطلب رقمها

بقالي كام يوم نفسي أشوف سمر . . بفكر اروح العمارة اللي كانت ساكنة فيها

واشوف لو حد ليه علاقة بأهل سمر يديني رقمهم

نفسي اعرف دخلت كلية ايه . . سكنت فين . . عملت ايه في حياتها اللي فاتت

ياتري عقليتها بقت عاملة ازاي . . وحشاني أوي . . وياتري هتفتكرني ؟!

هههههه هبقي عاملة زي غادة عادل في فيلم ( في شقة مصر الجديدة ) لما كانت بتدور ع الميس بتاعتها

___________

وفاكرة لما اكتشفوا فيا موهبة الرسم ع ايد ميس سلوي

فاكرة كمان شكل الترابيزات وهيه مرصوصة . . وفاكرة محمد اخويا كان قاعد هناك

وكنت حافظة من القرآن كتير . . وبيطلعوني في الحصص الفاضية اقول اللي حافظها

قولت أسماء الله الحسني وسور كتير

واخويا عمال يشاورلي ( عايزني اقول سورة الكوثر ) . . كان حافظها هيه بس عشان صغيرة :)

___________

فاكرة استاذة غادة . . وكانت بتتكلم هيه ووالدتي كتير . . هههههههه

ههههههههههه فاكرة ماما لما كانت بتعملي سندوتشات بيض . . والبيض مش كان بيحبني . . عامل زي اللبن معايا دلوقتي

وباكلها بالعافية

وفي حصة استاذة غادة كنت باكل السندوتشات

فاكرة المراجيح والزحاليق . . وفاكرة الواد اللي دراعه اتكسرت بسببها :)

___________

ههههههه فاكرة لما اتخانقنا مرة أنا ونورهان . . سلطت ولد اسمه محمود عليا

ههههههه عضيته في ايده وجابت دم واستاذة سلوي زعلت مني وقالت هتقول لأهلي

___________

بالمرة بقي فاكرة في 4 ب . . ولد كلمني في الفصل ( اسمه أحمد رمضان ) . .

قولتله مش تكلمني عشان والدي قال مش اكلم ولاد

رزل عليا

قولتله هضربك . . قاللي اضربيني

ههههههههه وأيامها كنت بتمرن مصارعة بقي

قولتله قوم . . قام . . مسكت رجليه اليمين وشنكلت الشمال برجلي . . حركة مصارعة بقي

الواد وقع ودماغه اتخبطت في الحيط وقعد يعيييييييييييط . . وأنا اطبطب عليه

واستاذة ماجدة حامد زعلت مني وقالتلي مش كنت اتخيل يطلع منك كده هههههههه كان في حصة الصيانة

_____________

قلبت ع شر . . ومرة برضه وأنا في 4 ب . . كان محمد في أولي اعدادي

كان عايز يدخل الحمام في المبني . . والعيال اللي معايا في الفصل موقفينهم أمن ع المبني مش عايزين حد يدخل في الفسحة

فقلبت خناقة بين اخويا . . وولد اسمه محمود عبد الهادي

أنا بقي اييييييه اخويا بيتخانق

هههههههههه دخلت اضرب في الواد هوه وأصحابه وروحت اشتكيت للميس وقرصتهم من ودانهم . .

واخويا عاتبني ساعتها وقاللي لما تشوفيني بتخانق بعد كده مالكيش دعوة

ههههههه من ساعتها بيبقي ادامي بيتخانق بقعد اتفرج عليه

_____________

ههههههههههه فاكرة مرة في 1 اعدادي . . ربنا يسامح اخويا

كان هوه في 3 بقي . . كنا بناخد مجموعة عند أ / سيد عبد الحميد ( دراسات اجتماعية )

وكان بيبقي في نفس اليوم . . مجموعتي الأول وبعدين اخويا

غاب المستر في يوم

رجعت بهزر مع اخويا . . مستر سيد غاب علشان مراته خلفت وجابت ولد سموه ع اسمك محمد

ههههههههههههه تاني يوم لقيت المدرسة كلها بتقول كده

والمستر بيناديني من الفصل بتاعي . . هههههه لقي مصدر الأوشاعة ههههههههه

مراته كانت في السابع باين

هههههههههه ده جزاء اللي يهزر مع اخواته

كفاية كده بقي

دفعة للأمام

السلام عليكم ورحمة الله وبركاته

الواحد حاسس إنه تخلف في الآونة الأخيرة

يمكن شعرت باكتئاب نوعا ما . . بس كفاية كده

مفيش وقت إني افكر . . ناقص أسبوع وأيام وابدأ امتحاناتي

أول السنة اتمنيت اطلع الأولي ع دفعتي . . ألا إن حصلت حاجات فضلت تشدني لورا

يمكن يكون حلم ( إني اتصدر دفعتي باء بالفشل ) . . لكن لسة في نور هناك شايفاه

اللي بايدي . . ابص هناك فوق الجبل . . واحاول اوصله . . (( هعمل كده أكيد )) إن شاء الله تعالي

إن وصلته كان بها . . والحمد لله

وإن لم أصل . . فيكفيني شرف محاولة صعوده . . وسأقول حينها أيضا . . الحمد لله

يمكن الواحد ساعات بيحتاج حد يديله دفعة إنه يحقق شئ ناجح

لكن طالما لم يوجد

فما لنا سوي أنفسنا

نقع . . ونقوم . . ونقع . . ثم نقوم

والآن علي أن أصعد ثانية . . اكن كالنسر شامخا فوق الجبال

لا كالأرنب أسفل تلك التلال

ها أن قد عدت ثانية . . بنفس عالية . . اقاوم واقاوم واقاوم . .

ثم ( اقاوم )

اللهم لا سهل لي إلا ما جعلته سهلا . . وأنت تجعل الحزن إذا شئت سهلا

الصـــراحة

السلام عليكم ورحمة الله وبركاته

كتير بيقولوا إن الصراحة راحة

وأنا منهم . . يعني اهوه لما بصارح أي حد بحاجة عايزة أقولها . . برتاح

وبحس بصفاء من ناحيتي ومن ناحية اللي ادامي . . ما هوه برضه بقولها بأسلوب لائق وغير جارح

لكن احساسي بقي . . لما الاقي حد مش صريح معايا . . خاصة إني يمكن اكون فاهمة

وعمال يلف ويدور يلف ويدور ومقدمات ووووو

أكيد الواحد بيتخنق . . لا مش كفاية . . بيمووووووت

والأسوأ من ذاك . . لو حد فضل مأجل شئ يقولهولك بعد فترة . . وخلال الفترة ديه

أنت بتطمح في الشئ ده . . وبتتمسك بيه . . وتتعلق . . ويوم عن يوم تتطور الأمور بالنسبة إليك

ع عكس الآخر . . يجهز لك شئ غاية في الأهمية ( ألا ستكون صدمة لك ! )

حين تيأس . . وتشعر بالتشاؤم . . بالاحباط . . والاكتئاب . . يوم سماعك الخبر المشئووم

وتشعر بأنه . . ( مجرد حلم صغير كتبته ع ورقة صغيرة داخل صندوق صغير موضوع في جحر صغير أعلي جبل في بلد بعيدة )

ها هو شعورنا نحوهم

أعز الناس

حين نراسلهم . . نسمعهم . . نراهم . . يكن لنا ذكري منهم

نحبــــهم . . دون أن نقول لهم . . فالموقف صعب . . بأن نقولها

نصل لقمة السعادة حينها

ثم يأتوك بكلام أشد من الخنجر . . بعد فـــوات الآوان

( كانت هذه دعوة للمصارحة . . اكتب شعوري . . فلم أجد من اصارحه بهذه الكلمات الحزينة )

لم يسعني سوي احتضان أمي . . دون أن أقول لها شيئا أو اعبر لها عن حزني الداخلي

ولم يري مني أحدا سوي

ضحك ومزاح ومرح وفرحة ووووووو

ولكن بالداخل ( اشعر بقلعة مظلمة . . وبوحدة ع مركب وسط البحر ليلا )

لا إله إلا اللــــــــــــــــــــه سبحانــك إنــــي كنــت من الظالميــــــــــن

هؤلاء لم ولن . . أنساهم 2

السلام عليكم ورحمة الله وبركاته

صديقــــــــات عمري

آية الله : أصدقاء من 1 ع . . نعرف بعض من 1 ب . . هههههههههه كنا ع طول في الامتحانات جب بعض أو ورا بعض . . ماشاء الله هيه علوم بيولوجي . . أول ذكري ليا معاها . . امتحان الخط في 1 ب . . وقلبت ورقة الامتحان ع وشها وشخبطلها ع ظهرها بالقلم ومش كنت عارفة انها ورقة الامتحان . . وراحت اشتكت للأبلة . . ههههههههههههههه وتتواصل الذكريات إلي أن تتصل بي اليوم وتقول لي كل سنة وأنتِ طيبة عشان يوم ميلادك .

آية سعيـــد . . كانت تقولل ع حاجة . . بنت تانية أكون قايلالها الحاجة ديه بصفاء نية . . فالبت تروح تقولها . . من هنا بقي حاسبنا بعض . . وغيرنا حاجات في بعض . . وبقينا أصحــــــــــاب وأصدقاء ورايحين جايين سوا من 2 ع كده . ماشاء الله هيه ألسن أسباني . . أموت واعرف أسباني ليه . .

حنان شوقــــــي . . ديه قلبي من جوة . . شخصية عسل أووووي . . صديقتي من 3 ث إلي الآن . . دخلت هندسة وآخر ذكري لينا قابلتها في كليتها وعرفتنا ع كل صحباتها ومشينا سوا هههههه بناكل شيكولا كادبوري باين اللي مكتوب عليها عبارات . . ربنا يكرمها . . بحبهــــــا جدا .

مني عادل وأميمة . . طب أسنان . . محترماااااااات جدا جدا جدا جدا جدا . . وبحبهم جدا جدا جدا جدا جدا ربنا يرزقهم جميعا الخير

دعاء عبد العزيز وإيمان محمد عبده وصفاء السعيد . . ماشاء الله دخلوا طب . . ال 3 بحبهم جدا وليا معاهم مواقف كتيييير زمان

إيمان ودعاء كانوا بينزلوا دايما متأخر أيام ابتدائي واعدادي وثانوي . . وانا بحب انزل بدري . . كانوا بيوقفوني كتييييييييير استناهم :)

إيمان عزلت . . بس نفسي تيجي تقعد معانا شوية ونتلم زي زمان في الأجازة .

صفاء ديه بقي . . أطيب بنوتة شوفتها في حياتي . . محترمة جدا وذوق ذوق . . كنت بدعيلها كتير أيام ثانوي عشان هيه تستاهل كل خير .

رنا . . ديه حلقة الوصل بيننا كلنا . . عزلت بدري بدري وكانت تركت بصمة في كل واحدة فينا . . كوميديانية أوي وبتغيظنا وبرتخم علينا لغاية دلوقتي .

وسام جارتي . . خريجة حقوق . . ديه بقي فلزة كبدي من جوة . . كنا بنروح نحفظ قرآن سوا . . ونقعد سوا نسمع . . ونذاكر سوا . . كااااااانت أيام . . اهيه اتجوزت 18/6/2009 وربنا يبارك فيها ويهنيها والبيبي ييجي للدنيا بسلام ويكون صالح . . اللهم آمين .

دعاء عادل . . أول بنت عرفتها في أول سنة في الجامعة . . كان بيضايقني فيها إنها مصلحة . . هيه ما زالت . . بس أنا فهمت شخصيتها وتأقلمت معاها .

شيماء سعيد . . عرفتها في أولي جامعة وحسيتها مني وأنا منها . . بنحب نقرأ . . بنحب نسلي وقتنا بحاجة مفيدة . . بنحب نتجنن . . أول ما نخلص امتحانات . . نتفسح وكانت أولي مرة في حياتي وحياتها نركب مركب اللي ب 2 ج وتمشي ربع ساعة في النيل :) . . وطلعنا برج القاهرة سوا . . وروحنا بقي الأهرامات النهاردة . . شيماء ديه بقي . . اللي حولنا سوا أنا وهيه جامعة القاهرة وروحت أنا كنسلت التحويل ورجعت حلوان وهيه مش رضيت ترجع . . ربنا يجمعنا في الخير دايما .

جهاد محمد . . هههههههه هقول اللي حصل في آخر محاضرة . . لقيتها في المحاضرة بتديني ورقة . . بتقوللي مش عارفة ليه أنا حباكي النهاردة أوي وحاجة كده عشان لما بدخل المدرج بسلم ع ناس كتير ومبتسمة ووووو . . بس أبهجتني بالكلام الحلو ده .

مروة حامد . . مدوخااااااااني . . أول صديقة ليا ع النت اعرفها . . من أجازة 2 ث . . الله يسامحها . . الفون بتاعي باظ وكل الأرقام راحت بما فيهم رقمها ودوخت عايزة اكلمه مش عارفة اوصلها . . وبعتلها كتير ع النت تسيبلي رقمها . . دخلت مرة بعتالي أزيك عاملة ايه ومش ادتني رقمها . . يبقي ربنا يسامحها . . واستنيتها تتصل بيا يوم ميلادي زي كل سنة . . --------- لكن مش اتصلت .

خلود محمد . . برضه صديقة ع النت . . مجنووووونة كورة . . مش بترحم خااااااالص . . أنا في وادي وهيه في وادي تاني . . بس لما بنتكلم سوا . . بنضحك ضحـــــــك . . ربنا يبعدها عن الكورة وع رأي عمرو أديب الكورة دائرية وملعونة .

طنط توتة . . بجد أنا مذهولة . . شخصيتها ما شاء الله . . ديزاينر ملابس وبتعمل أكل حــــــــلو أوي ( دماغ في الأكل ) وبتقعد نت وموازنة بين بيتها وكله كله . . ربنا يكرمها . . وطلبت مني شغل وأنا كسولة . . ربنا يسامحني بقي .

أم عز الدين . . عرفتها لما كانت في الامارات . . بس هيه دلوقتي أجازة في مصر من قبل رمضان بشهور . . ورغم إنها تلت ساعة واقدر اشوفها . . مش عارفة اشوفها علشان عندها توأم ( عز الدين ورانسي ) مش تقدر تنزل بالاتنين .

عزة محسن . . قلبي من جوة جوة . . خريجة تجارة القاهرة . . اخواتها كمان عسل أووووي . . وهيه طيوبة جدا وبيبي فيس كده . . ما شاء الله عليها . . كان كل ما اجي اشوفها يحصل حاجة ومش نشوف بعض . . منهم مرة اتفقت مع ناس كتير تبعي ومش يعرفوا بعض ع دار أيتام . . يومها خالي توفي الله يرحمه . . روحت وصيت صديقة ليا . . واديتها كل أرقامهم وكلمتهم وقابلتهم وراحت بيهم . . المرة الوحيدة اللي شوفتها فيها . . كان يوم 27 رمضان اللي فات . . لما اتفقنا ع مستشفي السرطان .

أميرة حمدي . . ( بلاش اتكلم ) أول ما عرفتها كان في قافلة لرسالة . . هيه في 4 هندسة دلوقتي . . قعدنا نناكف في بعض من أول ما ركبنا الأتوبيس لغاية ما وصلنا وبقينا نروح نوزع ونستكشف في جروب واحد وشغالللللين مناكفة في بعض . . وقابلتها تاني . . ومرة كمان صدفة وهيه ماشية قولت اخضها . . مسكتها من ايديها كأني بشحت . . تحفففففففة .

أميرة أحمد . . أول بنت عرفتها لما حولت جامعة القاهرة وحضرت أول أسبوع كنت طول الأسبوع ده بتحجزلي جمبها وبنتكلم في شتي أنحاء الحياة . . ولغاية دلوقتي بنتكلم . . وعرفتني ع صحباتها كمان . . محترمات أوي ربنا يكرمهم يارب .

راندا عبد اللطيف . . كانت معايا في ثانوي علاقتنا مش كانت أوي . . بس بعد ما خلصنا امتحانات روحنا امتحننا سوا في فنون تطبيقية وكنا بنروح المشاوير هناك سوا . . فبجد يوم ما بشوفها صدفة ببقي فرحااااااانة جدا جدا .

إيمان عاشور . . هههههه كنا علمي رياضة وكنت دايما اهزر معاها وأنا داخلة الفصل . . ورسمتلها رسمة قبل كده بس طلعت مش من نصيبها وخدتها آية الله . . واكتشفت كده بعد مدة طويلة . وإيمان ورندا . . دخلوا علوم رياضة .

شهندا . . في اتنين شهندا . . شخصياتهم مختلفة . . واحدة في كوكب والتانية في كوكب . . بس برضه بتبسط لما بشوفهم .

هههههههه أنا رغاية أوي . . وكل ما اشوف واحدة عزيزة عليا بنرغي طبعا . . فأكتر ناس مظلومة دلوقتي صحباتي اللي معايا في نفس الدفعة . . طول ما أنا ماشية في الجامعة عمالة أسلم وهما يبصولي بصة . . ربنا يسامحهم .

من أعز الناس إلي قلبي :

خالي ( رحمه الله ) توفاه الله رمضان اللي فات . . الراجل ده عنده كمية معلومات وتاريخ فظيعة . . عقليته كويسة جدا جدا . . وكان بيتكلم كذا لغة . . وقبل ما يموت كان ادي لماما ماكينة خياطة جديدة غير اللي باظت . . وأنا قعدت اشتغل عليها . . وآخر مرة كلمني كان قبل ما يموت بحوالي 3 أيام . . قاللي عقبال ما تيجي ماكينة التطريز قريب . . وقاللي حبي الماكينة تحبك . . واشتغل عليها دايما ومش اقطع . . وهزر معايا . . وأكتر حاجة ندمانة عليها في حياتي . . إني بتكسف زيادة عن اللزوم . . كنت بحب اسمع خالي وهوه بيتكلم لكن مش بناقشه كسوف . . وكان نفسي ييجي اليوم اللي اتكلم معاه عادي . . كنت بقول لماما دايما أنا بحب خالي أوي . . بجد أنا خسرت أوووووووووي . . الله يرحمك يا خالو . . فاكرة أيام ما كنت طفلة وبطنطط ع حجرك . . وقول عايزة اسرحلك شعرك وامسك المشط واتشعبط . . أيااااااااااااااااام . . الله يرحمك .

خالتي ( الله يرحمها ) توفت رمضان اللي فات بعد خالي في نفس الأسبوع . . تعبت أوي وكانت مريضة . . أنا كنت زمان اشوف خالتي لما نروحلها تقعد تشتكي كتير لماما وساعات تعيط وديه غلطت فيا وووو . . كانت بتشيل هموم . . وأكيد الهموم بتجلب معاها غموم . . وجالها السكر . . انهارت نفسيا . . مع ان في ناس بتكون مريضة وبتعيش حياتها عادي خالص . . بالطول بالعرض . . بالحب بالخير بالتسامح بالسعادة بكل حاجة حلوة . . وتعب جاب تعب جاب تعب . . وفي كل مرة تنهار . . الله يرحمها .

اتعلمت ( كل واحد فينا حساس من حاجات كتير . . بس الحساسية المفرطة متنفعش . . عايزين نبتسم لآخر لحظة في حياتنا . . يارب اسعدنا دنيا وآخرة ).

عمتي ( الله يرحمها ) . . ياااااااااااه . . ديه الجرح نفسه . . آست كتير في حياتها . . جوزها استشهد في الحرب . . ابنها لما كان في 3 ع غرق في النيل . . والدي كان بيحكي عن ابنها . . بيقول انه كان بيشتغل وراجل راجل بمعني الكلمة . . وابنها التاني توفي من حوالي سنتين أو 3 . . هوه ليه ابن في سني و3 بنات . . عمو لما كان يكلمني كان يهزر معايا . . ربنا يرحمه . . عمتي بقي بقت لوحدها محدش بيسأل عنها كتير . . وكتير أوي ببقي متضايقة . . أنا حاسة بيها . . ازاي تعيش لوحدها نهارها زي ليلها . . وكان نفسي اعمل حاجة مستحيلة ( إني اقعد معاها إني شاء الله أسبوع . . وطبعا كل اقتراحاتي فاشلة عشان بابا بيرفض أي حاجة ) . . عمتي جالها جلطة . . مبقتش تتكلم . . وخست أووووووووووي . . وتوفت ( ربنا يرحمها ) .

وفيــــــــــــه كتير وكل واحدة بعرفها بتترك في أثر

هؤلاء لم ولن . . أنساهم 1

السلام عليكم ورحمة الله وبركاته

الذكريات . . حاجات بعيش عليها . . بحبها أوي . . لما بقابل شخصية محترمة . . ببقي نفسي أخد منها ذكريات كتير .

سمر . . صاحبتي في الحضانة . . عزلت واحنا برضه في الحضانة . . لسة فاكرة لما كنت بنزل الصبح مع ماما وهيه رايحة الشغل

تخليني اقابل سمر ونروح الحضانة أنا وهيه سوا وأكيد معرفلهاش أي وسيلة اتصال . . عشان كنت طفلة .

أمل . . زميلة في ابتدائي . . بيقولوا بعيد لكن قريب . . اهوه هيه كده . . عزلت في سنة 4 . . مكانش ليا علاقة بيها أوي . .

بس كانت طيوبة وهادية . . وبتيجي ع بالي لغاية دلوقتي . . ببقي نفسي أشوفها .

سالي . . كانت صديقة الطفولة . . أصغر مني بكام سنة . . بس اعتقد كان عمرها عمر حضانة وأنا في ابتدائي . . كانت مامتها بتنزلها الجنينة واخد بالي منها عشان هيه صغيرة . . كنت بحبها أوي . . أسبوع واتنين وتلاتة وشهر حبيتها أوي . . حسيت كأني مامتها . .

لكن اتفاجئت أنها ماتت . . عملولها عملية في القلب وماتت . . زعلـــــــت أوي . . البقاء لله وحده . . بس لغاية دلوقتي ببص لشباكها وافكر فيها واتخيل إنها عايشة . . وأسأل نفسي ياتري أهلها لسة فاكرينها .

دميانة سعيد . . ههههههه كانت لذيذة . . ابتدائي واعدادي . . كنا بنتسابق كل البنات في الفصل مين هيقف في الطابور الأول . .

وكنت أنا ودميانة وواحدة كمان . . بنلبس لون مختلف عن لبس المدرسة . . عامل زي بتاع الكشافة . . وبنطلع نحيي العلم . . هههههه دميانة اكمنها مش مسلمة لما كانت تيجيلي البيت والأذان يأذن أو يبقي في قرآن شغال . . تخاف ومش تيجي . . بس ياريت كان في تواصل بيننا كنت دلوقتي قدرت اوصلها ولو جزء بسيط عن الإسلام واغير نظرتها . . وإن الدين لله . . هيه عزلت بقي .

أبلة عزة مدرسة خلطبيطة في 1 ب . . تقريبا عيني فتحت عليها . . لغاية دلوقتي بشوفها وبسلم عليها . . ورقمها معايا بس أنا نادلة مش بسأل . . ظنا مني . . هوه أنا في بالها ! زمان كنت اتصل بيها أسألها الواجب ايه وكل شوية اشوف ايه غلط وايه صح . . إنسانة محترمة .

أبلة عزة مدرسة علوم . . 4 ب . . كنت مش بفهم منها حاجة . . معندهاش القدرة ع إيصال المعلومة وحصتها تهريج . . بس كنت بحبها . . طيبة كده . . أبلة عزة ادتني في اعدادي كمان . . كانت بتحب أسئلتي وافتراضاتي أوي . . وعاجبها دماغي . . لكن في يوم جيت أسئلة سؤال كان في الطبقات الأربعة اللي حوالين الأرض والجاذبية . . فلسة بقولها هوه مش كذا . . فمستنياها تقول اه عشان أقول السؤال

هههههههههههه قالتلي ايه ده يا إيناس . . وأنا اللي فاكراكي بتسألي أسئلة ذكية . . أنا قولتلها لسة مش قولته وهيه مصرة . . انا وشي احمر واتكسفت اوي . . واللحظة ديه في حياتي غيرت مجري حياتي . . أبدا مبقتش أقوم أسأل لا مدرس ولا دكتور جامعة في حياتي . . حتي لو في حتة مش فاهماها . . يبقي غبااااااااء تدريس .

أ/ أحمد فتحي . . مدرس الرياضة في اعدادي . . كنت دراعه اليمين . . أنا اللي احضرله كشاكيله وأنا اللي احل ع السبورة أول واحدة . . كنت متجاوبة معاه بطريقة فظيعة . . كان واثق فيا في كل حاجة . . وجبت في 3 ع 60 من 60 . . أكيد ده أنا تربيته في الرياضة . . الكل كان فاكرني هدخل هندسة وبيقولولي باشمهندسة .

أ/ محمد السيد . . مدرس اللغة العربية في اعدادي . . محترم جداااااااا والدرس بتاعه كان أحلي درس بحبه . . كنت بتنافس أنا وصديقتي الصدوقة وبنحل امتحانات كتييييير وبصراحة الراجل عمل اللي عليه . . هوه كان شايفني في فنون تطبيقة . . علشان رسمي .

أ/ سيد عبد الحميد . . كان كوميديان أوي في شرحه . . كان مدرس جامد في الدراسات وليه حركات في ايصال المعلومة . .

أ/ أحمد كمال . . انجليش 2 و 3 ث . . أجمد مدرس ان انجليش شوفته . . وليه جروب ع الفيس بووك . . علم في حياتي .

أ/ سيد العدل . . عربي 2 و 3 ث . . اتعلمت منه كتير . . وفي الجامعة السنة اللي فاتت اتعمللي انترفيو كان في الابليكشن موجود مثلي الأعلي فكنت كاتبة المستر منهم . . في الانترفيو اتسألي استفادت ايه من درس الكلام والصمت اللي شرحه المستر . . طلع اللي عمللي الانترفيو يعرفه وكان بياخد عنده . . دنيااااااا

أبلة كرمة . . انجليش في ث . . كانت لذيذة حساها أمي . . خدت رقمها واتصلت بيها مرة . . ونفسي اتصل بيها بس احساسي مش هتفتكرني ع الفون . . نفسي اروح المدرسة واشوفها .

أبلة سريا ولا سندس . . مش فاكرة اسمها ولا عايزة افتكره . . مدرسة رسم ثانوي . . احساسي بإنها أحلي رسمة في حياتي رسمتها . . خدتها غصب مني . . وعيطت حصتين الرسم بحالهم ورجعت البيت منهارة . . لأن رسوماتي بالنسبالي هيه أنا . . وكل ما افتكر اعيط واتحايلت عليها ترجعهالي وقعدت تقوللي الموجهة خدتهم وتقييم وووووو . . وقعدت حوالي نص سنة رايحة جاية عندها وتديني في حجج وادتني رقمها وقالت لما الموجهة ترجعها هتدهالي واسألها وهيه في الاخر الرقم غلط . . وفي الاجازة الكبيرة برضه روحت مشاوير كتير . . بصراحة انا حاولت اسامحها . . بس ذلتني ع حاجة ملكي . . الله يسامحها .

طنط أم إيمان وطنط أم ياسمين . . الله يرحمهم . . طيبات ربنا يرزقهم أعلي الجنة .

طنط حنااااان . . كانت ساكنة في العمارة اللي جنبنا . . أنا مش عارفة جوزها كان فين . . بس كان معاها ابن بيبي . . كنت بروح عندها انا وصديقة الطفولة نرمين نلعب عندها ونتكلم معاها . . عزلت . . وحشاني أوووووووووووووي أكيد نسيتني . . كان أيام 4 ب .

. .

اعمل جزء تاني للواحد أما كبر بقي شوية مع ان فيه نااااااااااااس كتير عمري ما هنساها سبتهم في ذاكرتي

سنة جديدة عليا . . لكن ؟؟

السلام عليكم ورحمة الله وبركاته

امبارح كنت مبسوطة أوووووووووي وكنت مستنية 7/12 ده ييجي بفارغ الصبر

كنت هجيب لنفسي هدية كمان . . علشان نفسي ليها حقوق برضه . .

كنت هجيب كشكول يبقي فيه محاسبة السنة كلها . . ايه اللي كسبته في السنة

وايه اللي خسرته واحاسب نفسي أول بأول

والمنبه علشان أكتر حاجة بزعل عليها الوقت . . كل ثانية بتعدي (( يا ليا . . يا عليا ))

روحت النهاردة الجامعة بقي . . بس مش مبسوطة أوي

بس حاولت اكون مبسوطة

قعدت الف ع صحباتي بقي واخد منهم نصايح تفيدني في حياتي

ما هوه يوم ميلادي النهادة وكملت ال 20

وحابة ابدأ صفحة جديدة في حياتي . . ومتفائلة تفائل . . سبحان الله

يوم مشرق في حياتي . . هعيش بالحب بالخير بالتسامح بكل حاجة حلوة

وكل النصايح اللي كتبوها هحاول اعمل بيها السنة دي

واشوف ايه طموحاتي السنة ديه واظبط هحققها ازاي وايه المعوقات ليها واحاول احللي مشاكلي وووووو

لا جبت الكشكول ولا المنبه ولا فرحانة النهاردة

حاسة باكتئـــــــاب وحالة زهق وخنقة

في ناس كان مفروض يتصلوا بيا النهاردة . . ومش اتصلوا

فالواحد بيفكر

يارب احنا بنبقي شاغلين عقلنا ونفسنا بأشخاص مهمة في حياتنا

ومديينهم قدر كبير جدا جدا جدا

وهما عارفين كده كويس

وأكيد في أي مناسبات بتيجي بنحاول نسبق الكل عشانهم

وبنستني منهم ولو كلمة (( حلوة ))

لكــــــــــن . . بنرجع نبص ع الأرض

ونلاقي كل ده ____________

هما مشغولين ؟!

طب عننا ؟!

طب لو مشغولين عننا . . مش يقدروا يستغنوا عن دقيقة من وقتهم . . عشان خاطر

كل سنة وأنتِ طيبـــــــة

بارك الله لي في أمي ورزقها الخير أينما كان . . وأطال في عمرها صالحا . . وجمعني بها وبكل أحبائي أعلي الجنة عند الحبيب المصطفي صلي الله عليه وسلم

أمي حبيبتي . . الوحيدة التي أسعدتني اليوم . . وكان نفسها تعمل أكتر من اللي عملته

مع إنها عملت كتيـــــر . . جزاكي الله كل خير أمي

هنام زعلانة النهاردة . . وهأجل الكشكول والمنبه

لا إله إلا أنت سبحااااااااانك إنا كنا من الظالميـــــــــــن