وقعنا ^_^

السلام عليكم ورحمة الله وبركاته

لقد وقعنا في الفخ :D

I have a life

السلام عليكم ورحمة الله وبركاته

حب حياتك أوي واعشقها
واعمل كل اللي بيرضي الله . . متخافش ما دام ربنا راضي . . عيش زيك زي الناس عادي

واللحظة اللي أنت سعيد فيها . . افرح بقي خليها ع الله

( أنت وبس في ايدك حلك )

- - - -
I love simple life .
. love my life . . I'm Simple :)
I don't need anyone
help me to solve my problems.
cause I can make a
plan . . I can do my best . . I can solve all my problems
I wanna live my life as it is . .

live it simply, I
love drawing my life as I want
not as people want

وايه هيه الدنيا . .
غير . . سجدة . . لله . . ودعاء . . من القلب

حاسة . . إني مش عايزة أي حاجة من الدنيا غير اموت وأنا حاسة ( بالرضا )
بالنسبة لي دي أحلي حياة ممكن تتعاش
أمنياتي . . بسيطة . .
بدعي ربي يحققهالي في كل سجدة

لو الناس شايفاني معقدة . . عادي . . ميهمنيش
أنا كده . . كما أنا .
. اللي عايز وحابب يتعامل معايا زي ما أنا . . اديله ابتسامة بسيطة وأقول
welcome
اللي مش عايز . . عادي
. . نفس الابتسامة وأقول as you like
بيعقدوا الحياة . . ويعقدوهالنا
كل وااااااحد يخليه في حياته . . يركز فيها . . ويركز ع تغيير نفسه . .

مفيش كلمة أقولها دلوقتي وتبقي خارجة من قلبي وحاسة برضا
غير

(( الحمـــد لله ))

وحصدنا اللي زرعنا

السلام عليكم ورحمة الله وبركاته

اهي علامتنا معنا . . وحصدنا اللي زرعنا

من جد وجد نجاحه . . ومن زرع حصد فلاحه

ولا ليلة ولا يوم من قبل الليلة دي نوم . . سهرنا ليلنا ونولنا

والليلة دي يا قمر برضه مسهرنا السهر نغني فيها لنجاحنا

يا هناه اللي بصبره قضي لياليه وتعب طول عمره راجع ليه

شهادات علامات حسنات بركات . . وأنا عايز أكتر من كده ايــــه

بالعلم هنصنع أحلي حياة . . والعمل الصالح يقوي معاه

وهنفخر بيه . . ونغني ليه . . وهنبني عليه مستقبلنا

------------

كريييييييم يارب

أنت العالم بحالي . . الحمد لك والشكر لك يا الله

كنت نمت عشان خايفة من النتيجة . . والحمد لله صحيت ع جهاد بتتصل بيا

النتيجة ظهرت

أول ما شوفتها . . نطيت من مكاني اتطنطط اتطنطط . . صحيت اخويا وصحيت ماما

واتصل ببابا . . واتصلت بأحمد . . وقولت لكل الناس إني فرحانة

وكلمت طنط أم محمد وجبتلها كانزات

وجبت كانزات ووزعتها بعد التراويح ع أحبائي في الله

فرحت أوي . . وشاركتني الفرحة طنط أم عبير . . خدتني جامد بالحضن

وقعدت في الصلاة جمبها . . وأنججتها ونمت ع كتفها

وقضيت اليوم مع صحباتي ع الفيس . . فرحنا فرحنا

أحبــــــك ربي . . أحبك . . يارب أخلصت ليك في الدعاء . . وكنت بحس بشوق للسجود كل ما ارفع راسي

الحمد لله

Beautiful Soul

السلام عليكم ورحمة الله وبركاته

حابة اتكلم وخلاص :) وأقول كل اللي نفسي أقوله

بحب الأناشيد أوي وبكره الأغاني . بس بحب اسمع حمزة نمرة وماهر زين

بحب البطاريق / ونفسي لما نعزل اربي سنجابين / بحب الحمام وبحب اعلمه الطيران

بقدر كلمة ( صداقة ) .وبقدر كلمة ( حب ) . مش الحب اللي بين اتنين ده . لالا الحب السامي ( الحب في الله )

كل يوم بصحي الصبح بقول لنفسي (Today is the best day in my life )

بحب الأطفال أوي وهما كمان بيحبوني أوي :) , ومهتمة أوي بالتربية والعلاقات الأسرية

بحب اشتغل حاجات بايديا ( هاند ميد ) , وبحب الرسم لكن مش برسم كتير , وبحب التصوير أوي أوي

مجنونة , وبحب اعيش لحظات حياتي بسعادة , نفسي أوي اصلي الصلوات الخمس في خمس جوامع مختلفة في يوم واحد

خايفة أوي من الموت , وحاسة إني مش جاهزة ليه , نفسي اتم حفظ القرآن قبل ما اموت

بحب الشتاء جدا , وبرضه بحب باقي الفصول , بس الشتاء بحب فيه الدنيا لما تكون برد وادخل البالكونة بالليل والكل نايم واسمع أنشودة انتصف الليل

واقعد بقي افكر في إني إنسانة عايشة في شقة جوة عمارة جوة منطقة من مناطق كتير ع كوكب الأرض وفيه كواكب تانية وكله بيدور حول الشمس وفيه أقمار ونجوم وده كله جوة مجرة درب التبانة وفيه مجرات تانية , بقعد افكر في الروح وفي الإنسان وفي كل حاجة ربنا خلقها

وله في خلقه شؤون ............. فعلا سبحان الله ع كل شئ

نفسي أوي أوي أوي بجد ازور بيت الله .... وإن ربنا يقدرني أنا وأهلي ونكون سوا

ونفسي يبقي عندي مجلة । । وكمان نفسي اشتغل عشان اجيب هدايا لكل الناس اللي بحبها

لما بعز حد أوي । । بديله رسمة من رسوماتي علشان الحاجة الوحيدة اللي بحب احتفظ بيها لنفسي ( رسوماتي )

أكتر حاجة ممكن اندم عليها ..... إني اديي ثقتي لحد ميكونش ادها

بحب الكتب أوي ...... وحاليا بقرأ كتاب ( أجمل بنت في العالم ) .... طبعا من منظور ديني بس كتاب تحفة فعلا

بحب الذكريات .. بحب اعمل ذكري مادية في اللحظات المعنوية . يعني لما اقابل واحدة صاحبتي اخليها تكتبلي في ورقة

أو اخد منها وردة أو احتفظ بتذكرة المترو واكتب عليها روحنا فين ..... كده يعني

بحب أهلي أوي ... جدعان أوي أوي .. اخواي رجالة بجد .. عمري ما شوفت حد زيهم .. وعمري ما هشوف

بجد الناس دي ياما تعبت عشاني وبيقدروني أوي ....... بحب بابا وماما أوي أوي

الاتنين ياما تعبوا عشاننا .. وأنا مبسوطة أوي إن مفيش فجوة عندنا في البيت .. وبقعد اهزر مع بابا كتير

وبابا دايما بيقعد يضحك بسببي .. وبصراحة بقعد اناكشه كتير أوي وميتهيأليش كانوا هيلاقوا بنت أحسن مني :) ها ها ها

بس والله بابا جدع أوي مع الناس .... ودايما بيقف جمبهم ..... ماما ديه بقي اللي زي العسل تتحط ع الجرح يطيب

أنا واللي أتمني حماتي إن شاء الله تبقي زي ماما كده । । أمي دي كراكتر لذيذة أوي ومصحباني أنا واخواتي

وليها اهتمامات عسل أوي .. وطيوبة جدا جدا جدا .. نفسي ابقي ارد لعائلتي العسل دي جزء من اللي عملوه عشاني

نفسي اروح والت ديزني / وتايلاند ... وهنا لازم اركب فيل في الشارع / وجزر المالديفز

بستمتع بوقتي أوي ادام الأفلام الوثائقية / وبحب أوي الأعمال التطوعية / بحب الندوات جدا والكورسات

وبحب اسمع الحلقات الدينية / ونفسي احضر صالون ثقافي بس يكون ( الصبح :) )

بحب المغامرات ..... نفسي اركب العجلة تاني // ونفسي اتسلق جبل :) // نفسي اجري تحت المطر

نفسي اركب حصان وجمل

نفسي بقي ازور كل محافظات مصر واخدلي ذكري وصورة من كل محافظة فيهم

نفسي اشترك في فرقة إنشاد إسلامية । । نفسي بقي بجد بجد ادرس علم شرعي بعد التخرج

وقولت كده لماما وإنه مش ليا دعووووة بقي :)

أخيرا بقي .... يارب يارب يارب زيل الغمة اللي في الدول العربية وارفع عننا البلاء

يارب يارب مصر بكرة تبقي أحسن ..... وافرجها يارب ع اللي بيحصل في ليبيا ..... وخللي كل زعماء العرب يتعظوا

ونبدأ بقي عهد الإصلاح ...... يارب يكون فيه تغيير حقيقي ( للأحسن )

:) سبحان الله । । والحمد لله । । ولا إله إلا الله । । والله أكبر

يؤجل الله أمانينا ولا ينساها

السلام عليكم ورحمة الله وبركاته

في حاجات كتيرة أوي نفسي اعملها . . امتحنت 3 مواد والحمد لله . . وناقصلي 3 . . هقول ربنا يستر . . يارب نتخرج ع خير

فيه حاجات كتيرة أوي كانت غايبة عني . . اقدر أقول كنت في غيبوبة شوية . . بس الحمد لله عدت

ندخل في المهم , ,

أنا جوايا شحنة مش طبيعية . . ما أنا حاسة حياتي بتضحك . . وطموحي مالوش حدود

* نفسي ارسم بيت أحلامي . . واوصف كل ركن فيه . . واتكلم عن زوجي بإذن الله وأولادي ( ربنا يرزقنا الصلاح ) .

واكون زوجة صالحة لزوج صالح وربنا يرزقنا بالذرية الصالحة اللي عشت طول عمري احلم بيها واعلقها ع الحيطة .

علشان كل يوم عيني تشوفها وتتخزن في عقلي الباطن . . فييجي اليوم اللي إن شاء الله (( تتحقق الأحلام ))

* نفسي ارجع اشترك في مسابقات التصوير والفوتوشوب . . وكل شوية انزل وانزل صحباتي مخصوص علشان اصور صورة معينة.

* نفسي الأجازة الكبيرة تيجي وابدأ المجلة بتاعتي . . الحمد لله ربنا رزقني بمعرفة ناس كنوز . . هيبقي ليهم بصمة في المجلة .

* نفسي ارجع دار خديجة واستمر فيها بقي . . ( بس طبعا بعد امتحانات آخر السنة ) . .

علشان ارجع بقوة إن شاء الله . . بس هقعد احفظ مع نفسي أو مع أصحابي كام جزء خلال الفترة الجاية إن شاء الله . .

واقرأ شوية في الفقه . . واراجع ع الأربعين النووية علشان اعتقد فيه أحاديث نقصاني . . يارب يارب ياااااااارب

والشي اللي فرحني إننا إن شاء الله لما نعزل . . البيت اللي جمب البيت اللي جمبينا فيه دار حفصة . . يارب يارب ارزقنا حفظ كتابك .

* نفسي اتدرب في شركة استيراد وتصدير عشان اخد خبرة . . وبابا ممكن يساعدني إني اتدرب في الاستيراد والتصدير عندهم في الشركة . . يارب يارب سهلها .

* نفسي اعمل مدونة واسميها ( زوجي قرة عيني ) . . واقعد اكتب فيها حاليا وحتي بعد ما اتجوز إن شاء الله . .

علشان كل حاجة هكتبها فيها إن شاء الله . . هي بمثابة حاجة هقدمها لبيتي بلمساتي وقدراتي علشان يكون (( أسعد بيت )) . .

* نفسي اجيب 4 هداية لـ 4 أشخاص في حياتي (( أحبهم )) . . والدي ووالدتي واخواي أحمد ومحمد ربنا يحفظهم يارب ويخليهم ليا . .

يارب يارب ارزقنا جميعا حج البيت الحرام . .

* نفسي بقي الأجازة ديه اتفسح . . واقابل شيماء سعيد وسارة حسام وهناء صابر وهاجر ممدوح ودينا محمود وإيناس حسن وأحلام ورنا محمد وأميرة حمدي وزينب ومي . . دول اللي اتفقت معاهم حتي الآن إننا هنتقابل إن شاء الله . .

أما بقي قمة الندالة آية الله وآية سعيد ( انتيماتي ) . . دول هيتقتلوا في الأجازة . . آية الله ماشي بشوفها في صلاة الجمعة . .

بس برضه عايزة اعضها . . آية سعيد بقي (( لا تعليق سوي إني هروحلها البيت والباقي بلاش أقولكم عليه ))

* نفسي بقي اروح كالعادة معرض القاهرة الدولي ( بس عايزة احدد حاجة اشتريها من هناك والمرة دي ننزل بدري شوية ) . .

واتفقت مع هاجر وصحباتنا نروح معرض الكتاب . . بس فكرة البت زوزو زلابيا بإنه ماله سور الأزبكية . .

وقعدنا نتكلم شوية عن أكلة رنجة بقي والذي منه . . ( ههههههه الشي اللي فعلا أثار إعجابي ) . . فلسة فيه مفاوضات . .

بس طبعا أنا وشيماء سعيد لازم لازم ولا بد إننا ناكل بيتزا في بابا جونز علشان نستعيد الذكريات الجميلة :)

* نفسي اعمل كراكترز كارتون بسيطة ع القماش واعملها بالخيط الملون . . ونفسي اعمل ورد كتير

علشان اظبط سبت الورد . . ويبقي أروع من رائع . . وطبعا ماكينة الخياطة مستنياني اعمل ملايات سرير ع ذوقي .

ومفارش بشرايط الستان . . واروح بقي ارزل شوية عند طنط سعاد . . بصراحة وحشتني فوق ما تتخيلوا . . الله

ده أنا فيه ناس كتير مش بكلمها ووحشوني أوي . . نفسي اكلم طنط حنان وطنط أم عمروا اللي كانوا بيحفظوا معايا أنا ووسام . . هعيط

ياااااااااااه . . اد ايه الواحد حاسس براحة نوعا ما . . عمالة افكر في الناس دي . . صحبة السيدات الفاضلات وصحبة الفتيات اللي في سني

حاسة إني (( محظوظة )) .

* نفسي البس لبس دونالد داك في أي دار أيتام . . واقعد بقي العب مع العيال واغنيلهم كاكي كاكي كاكي كاك البطة أطة الانتيكة كا كا كا كا.

* نفسي ارسم ع وشوش الأطفال فراشات وورد وسوبر مان وكل الحاجات اللي بتفرحهم . . وبرضه نفسي ارسم ع التي شيرتات أنا وهناء .

* نفسي ابقي طباخة شاطرة شاطرة واعمل حاجات ولا أجدعها خباز واعمل تورتات بقي وارسم عليها كمان.

* نفسي اعمل فرقة أناشيد إسلامية . . بس الأول انضم لفرقة علشان ديه سهلة . . وطبعا معايا أميرة حمدي :)

يارب يارب . . حقق كل أحلامنا . . واكتبلنا الخير فيها . . مستنية الأجازة بفارغ الصبر علشان احط خطة السنة إن شاء الله

كويس إني كتبت دول دلوقتي علشان اجمع بقي كل حاجة اللي كتبتها واللي مكتبتهاش واظبط نفسي وحياتي . . واظبط الكبيرة بتاعة السنة . . واحط الخطط المتوسطة بتاعة الشهور . . واحط الخطط الصغيرة بقي بتاعة كل أسبوع .

. . To make a WISHE come true

يا مسهـــــــل يارب . . الأحلام موجودة . . وقوية . . والأفكار مفيش أكتر منها . . والوقت متاح

يارب ارزقنا عزيمة تخلينا زي الصقور فوق الجبال . . مش زي الأرانب تحت التلال

وحشتني أوي

السلام عليكم ورحمة الله وبركاته

هكلمكم عن واحدة . . يمكن طول عمري كنت أتمني يبقالي أخت . . بس هيه " أختي "

من أعز الناس في قلبي " سومة جارتي "

وحشتني أوي . . وكتير بفكر فيها . . ببقي نفسي أشوفها كتير

هعرفكم بيها الأول . . وسام أكبر مني ب 3 سنين . . وخريجة حقوق . . جارتي منذ الولادة

ياما لعبنا . . وزعلنا من بعض . . وفرحنا . . كنت أنا وهيه كأننا مولودين في بيت واحد

طبيعي نذاكر مع بعض . . ولما حد يعيط يروح للتاني يقعد معاه

كنا بنروح دار خديجة لتحفيظ القرآن الكريم مع بعض . . وحتي في لحظات حفظ الورد اللي علينا

بنحفظه مع بعض . . حتي بعد مش بقيت اروح . . بس هيه كانت متخرجة بقي فكانت بتروح

برضه كانت تطلع تحفظ عندي . . كنا ع طول بنتنافس

فاكرة لما كنا نتخانق مين يتوضي الأول . . ونتريق ع الشبشب اللي ع باب الحمام عندهم

مسمينه شبشب التشريفة . . عشان اخوها كان دخل يصلي وهوه في وسط البلد وكان لابس جزمة غالية

بس دخل وصلي مالقاش لا الجزمة ولا الشراب . . وادوله الشبشب ده

سومة اتجوزت وخلفت أنس حبيبي ( بحسه ابن أختي ) ربنا يخليهم ليا

بس سابتني . . كتير ببقي نفسي انزل عندها واقعد معاها . . وتاخدني في حضنها . . واقولها تساعدني

وكتير ببقي عايزة اذاكر عندها لأني مش عارفة اركز في المذاكرة

بس خلاص :( . . ورغم برضه إنها ساكنة معانا في نفس المنطقة . . بس برضه صعب أوي

اتصلت بيها أول يوم امتحان ليا . . كانت نايمة . . واتصلت امبارح محدش رد . . والنهاردة محدش رد

وحشتنيني أوي يا سومة . . وحاسة محتاجة اقعد معاكي . .

أنا مش عارفة اذاكر . . وبقيت مدمنة تفكير ( بجد حسبي الله ونعم الوكيل في اللي سببلي كده)

يارب مالناش غيرك

. .

نزلت اجيبلي شوكولاتة . . وأنا نازلة ع السلم عمالة افكر اخبط ع باب طنط مامة سومة

بس خوفت تكون نايمة . . وعمالة اتخيل بقولها يا طنط بنتـــــــك راحت فين

سبحان الله . . روحت جبت الشوكولاتة وداخلة الحي بتاعنا . . لقيت طنط في وشي

وقالتلي إن وسام بتروح لحماتها . . وإنها بتسألها عليا و ع امتحاناتي وبتسلم عليا

بصراحة حاسة عايزة اعض البت ديه . . هيه وابنها :) . . اشمعني مامته يعني

طلعت بقي . . ولقيت محمد بيكلم بابا ع التليفون وإن بابا عمل حادثة :(

عربية نقل خبطت في العربية من ورا والازاز اللي ورا اتكسر وخبطة كبيرة بقي

قلبي ارتاح لما عرفت بابا كويس . . الحمد لله . . ربنا بيسترها

هاه . . ارتاحت شوية اهوه . . ربنا يستر بقي في المذاكرة والامتحانات

والحمد لله ع كل شئ

ياللا بقي . . في رعاية الله

حينما نضحك للحياة . . لازم تضربلنا تعظيم سلام D: طم طم

السلام عليكم ورحمة الله وبركاته

أهلا أهلا . . وسهلا وسهلا . . اخواني واخواتي في الله ( أزيكم )

أنا عارفة إني لوحدي هنا في المدونة :) . . بس برضه مفيش مانع الواحد يتمنظر شوية

أنا بقي بصراحة الأيام اللي فاتت ومازلت الأحوال ( مش لطيفة ) حبتين

بس ايه . . الواحد بيقاوم . . ومش أيتها مقاومة . . ولله الحمد

قررت ارجع البسمة بتاعتي . . واعيش حياتي ( صح ) . . ما يا عيال الواحد مش هيعيش غير حياة واحدة

هملي بقي المدونة كلها طبل وزغاريد وكأنه يوم فرحي

. . نتكلم جد شوية . .

النهاردة لقيت ازازة حاجة ساقعة سفن أب ( مش إعلان يا جماعة . . اوعوا تفهموني صح ) . . مستخبية في التلاجة

قولت شكلها غريب شوية . . زي أما يكون سفن أب بجد . . قولت اجرب . . ما هيه يا هتطلع مياة . . يا سفن أب

فتحتها . . وشربت ( وطلعت فعلا سفن أب ) . . يا لذيذ يا رايق

وندهت ماما بقي . . هيه تشرب وأنا اشرب . . هيه تشرب وأنا اشرب

بتقوللي اسيب لمحمد . . قولتلها لا . . ما ع طول بيشرب

ودخلت مليتها مياة بنفس المقدار اللي كانت مملية بيه . . وحطيتها في نفس المكان اللي كانت مستخبية فيه

ويا عيني بقي . . محمد ع نص اليوم كده . . بيطلع يشربها

ههههههههه وكان معايا تليفون . . ولقيته فجأة بيقول ( مين اللي عمل فيا المقلب ده ؟!!! )

وأنا هوبا فطست من الضحك كركركركركركر

وكل ما اتخيل بقي إنه الواحد ادامه حاجة مغرية مشبرة وفيها نكهة ليمون ومسكرة . .

أيوة هيه اللحظة ديه لما خلاص الواحد حاسس هيرتوي ههههههه ومهد كل شعوره وأحاسيسه

وفجأة . . هههههههه أحاسيسه تفوق ع ( بق مياة )

. .

وديه كانت مكيدة من مكايدي . . نياهاهاها

كملت 21 سنة النهاردة

السلام عليكم ورحمة الله وبركاته

النهاردة . . يوم ميلادي

هوه مش حزين ومش سعيد . . هوه " عادي "

كان نفسي افرح بصراحة . . اكلم أعز الناس وانبسط

وانزل مع اخويا ويفسحني

بس كله كله باظ

ولا هدية جاتلي . . ولا كلمة رقيقة من أعز الناس . . ولا اتفسحت

ولا حتي فيه جاتوه ولا تورتة والكلام الفاضي ده كله

ام ام ام . . بصراحة أنا بفكر ومش عارفة اعمل ايه

أعز الناس كلموني وحش . . واخويا راح انترفيو . . واخويا التاني نزل هوه وماما لوالدي في القاهرة الجديدة

وأنا قاعدة لوحدي دلوقتي

بفكر أنا احتفل لوحدي . . هوه أنا مش من أنصار أعياد الميلاد والحاجات الهابلة دي

بس أنا ببقي نفسي اكون فرحانة في اليوم ده علشان احط خطة للسنة الجديدة امشي عليها

بحس يعني إني اتولدت من جديد . . بيبقي حصل حاجات وحشة السنة اللي قبلها مش عايزة افتكرها

وبصدق اليوم ده ييجي فاركن كله وراء ظهري واركز في السنة دي

قاعدة قعدة صامتة . . حاسة مفيش حاجة فارقة

ومش عارفة اذاكر وخلاص حاسة بقت المذاكرة أمر ميؤس منه . . والسنة دي لا مفر منها

اعمل ايه يااااااااااااااارب

اروح اصلي العصر واجي ابدأ موضوع جديد . . يمكن يصلح اللي انكسر :)

طعم الحياة . . بنبون :)

السلام عليكم ورحمة الله وبركاته

ياهوووووووووووووو . . العالم بتاعي رجعلي

هوه اه لسة مش رجع كله . . بس أنا متفائلة

أحبــــــــــــــــــــــــك ربي

يا الله . . أحلي حياة في طاعتك . . يارب مبتردش حد يسألك أبدا

يااااااااه . . قبل ما كل حاجة تروح فعلا الواحد لازم يلحق نفسه . . ويدعي

قال صلي الله عليه وسلم : " لن ينفع حذر من قدر , ولكن الدعاء ينفع مما نزل ومما لم ينزل , وإن البلاء لينزل فيتلقاه الدعاء فيعتلجان ( يتصارعان ) إلي يوم القيامة "

مبسووووووووووووووووووووطة أوي يارب

وديمها علينا نعمة . . الحمد لك والشكر لك يا الله

ها أنا ذا . . أقبلت علي الدنيا ثانية . . بنفس راضية

الحمد لله يااااااااااااااااااااااااااااااااااااااااااااااااااااااااااارب

أنا الفرخة واحنا الكتاكيت . . اكلكوا ايه اكلكوا فتافيت . . لعبكوا ايه . . جري وتنطيييييييييط

مبسوووووووووووووووووووووووووووووووطة وحاسة إني طايرة

يارب ديمها يارب :)

محاولة فاشلة وحياة بائسة

السلام عليكم ورحمة الله وبركاته

حياة بائسة بالأبيض والأسود

عام جديد من عمري . . بدايته " لا تعليق "

أمر بأسوء اللحظات في حياتي

لم اضع هذا اليوم في الحسبان

فعندما رسمت أحلامي . . وقعت عليها " لا يمكن الرجوع عنها "

فعزائي لنفسي . . التي ادعو لها بالرحمة

لا إلــه إلا أنـــت سبحــــانك إني كنـــت من الظــالمين

Just Like Heaven

السلام عليكم ورحمة الله وبركاته

كم اشعر بالنجوم تتلألأ حولي . . وبيدي لمست أحلامي

تلك الضوء الساطع الذي لطالما حلمت به

أن أكون . . .

اشعر بشعلة أمل لامست قلبي فهلل

كم أنا فرحة الآن . . واشعر وكأنني أريد الحديث لمن لا أراهم

ادعو الله أن يكون ما في قلبي الآن . . هو في قلوبهم

واتسائل هل يشعرون بنا ؟!

لا اعرف مصدر فرحي . . ولكنني فرحت لفرحها

" ضاقت فلما استحكمت حلقاتها فرجت وكنت أظنها لا تفرج "

لم تفرج بعد . . ولكنني اشعر بأنها ستفرج قريبا

كم أحبك ربي . . فكم كنت حزينة ولجأت إليك فجعلت محل قلبي سرورا

اللهم إن كنت عندك شقيا فبقدرتك امحي واكتبني عندك سعيدا

. .

لو في يوم كان الحمل عليك تقيل

وتايه لوحدي مش لاقي دليل

والهموم تخللي الليل طويل

وترميك في غربة ومرارة وويل

مد ايديك . . تلقاه دايما حواليك

هو الله قبلك حاسس بيك

لو في يوم خدتنا معاصي أو ذنوب

وخافت قلوبنا ما تقدر تتوب

وتشكي الروح

ومين بالسر ليه نبوح

ومين اللي يقدر يداوري من الجروح

مد ايديك تلقاه دايما حواليك

هوه الله قبلك حاسس بيك

قول يا الله . . اهدي ليا قلبي عشان اتوب

امحي الذنوب

اهديني للطريق . . نور لي الطريق

" إن شاء الله هتلاقي الطريق "

لتكوني سعيدة . . فقط ليوم واحد هو ( اليوم )

السلام عليكم ورحمة الله وبركاته

ما أريد فعله اليوم ( هو محاولة لإسعاد النفس ) بإذن الله

فقط لأضع بعض البريق ع يومي فتضفي علي سعادة لأعيش عيش السعداء

ادعو الله ألا تفشل . . فلتبقي دعواتي ( يارب ) زيح عني همي واجعل قلبي مقره سعادة ونورا

اللهم آمين

دعوني اناجي

السلام عليكم ورحمة الله وبركاته

ربنا الحي الرقيب يقبل العبد المنيب . . فهو رحمن مجيب للدعاء ومن دعاه

ربنا الهادي الودود فضله ملأ الوجود . . عفوه خيرا و جود فارتجي دوما رضاه

يااااااااااارب . . محتجالك أوي يارب

أنا تعبانة . . وزعلانة . . وأنا مبقتش أنا

بقعد الف الف الف وانسي المدونة . . ويوم ما ملاقيش حد جمبي اجي اشكي نفسي هنا

في المدونة المهجورة . . ديه ميزتها برضه إن محدش بيشوفها

ياتري فعلا ايه في دماغي وعايزة ايه ؟!

وهفضل لامتي مشتتة كده . . ربنا يسامح أي حد كان سبب في إني اوصل للحالة دي

أنا بعييييييييييييييييييييييييييييييييييييييييييييييييييييط

بجد يارب مش قادرة . . مش قادرة مش قادرة

تعبااااااااانة أوي . . وبرتعش . . يارب أنا خايفة حد يشوفني كده

وخايفة انام . . لأني مش عارفة انام

نفسي اكووووووووووون مبسوووووووطة . . وحشني أوي شكلي وأنا مبسوطة

وحشتني ضحكتي . . ووحشني هزاري البايخ . . وحشني طنطيتي

الساعة 6 إلا ربع صباحا ومنمتش من امبارح غير ساعتين

:( . . مش عاااااااااااارفة انام

( لا تندم ع الماضي لأنه انتهي . . ولا تقلق من المستقبل لأنك لا تعرفه . . أتريد أن تقضي حياتك بين الندم ع الماضي والقلق من المستقبل . . عش يومك كما تريد أن يكون . . فسعيد أو كئيب )

أنا بقول كده للمحبطين . . بس عمري ما تخيلت إني اقول لنفسي كده

أنا قلقانة أووووووووووووووووي . . يارب هدي سري . . وابعث في نفسي الطمأنينة

يارب أنا عارفة إن مفروض مش ايأس . . وإني المفروض اخذل الشيطان أعوذ بالله منه

أنا هحاول يااااااااااااااااارب . . ارجع تاني زي ما كنت

يارب يارب فك كربي . . وزيح عني همومي وغمي . . يارب خرجني من الحالة ديه

وطمنني . . فيه حاجات كتير في حياتي وحشتني

أحبــــــــــــــــــــــــــــــــــــــــــك ربي

دعوني أناجي مولا جليلا . . إذا الليل أرخي عليا السدول

نظرت إليك بقلب ذليل . . لأرجو به يا إلهي القبول

لك الحمد والمجد والكبرياء . . وأنت الإله الذي لن يزول

وأنت الإله الذي لم يذل . . حميدا كريما عظيما جليلا

تميت الأنام وتحيي العظام . . وتنشي الخلائق جيلا فجيل

عظيم الجلال كريم الفعال . . جزيل النوالي تنيل السؤل

حبيب القلوب غفور الذنوب . . تواري العيوب تقيل الجهول

وتعطي الجزيلا وتولي الجميل . . وتأخذ من ذا وذا وذاك القليل

خزائن جودك لا تنقضي . . تعم الجواد بها والبخيل

دعونا نناجي مولا جليلا . . إذا الليل أرخي علينا السدول

يارب . . لا إله إلا أنت سبحــــــــــانك إني كنت من الظالمين

هوه ممكن صديقة عمر تضحي بصديقتها ؟!!

السلام عليكم ورحمة الله وبركاته

الصداقة . . كنز لا يفني

الصديق . . وقت الضيق

شعارات . . نرفعها في الاعتزاز بأصدقائنا . . وطالما كتبت تلك الكلمات

اتذكر . . ما مضي

ع طول بتكلم عن الصداقة مع اللي اعرفه واللي معرفهوش . . وأقول دايما أكتر حاجة اعتز بيها الصداقة

واتكلم عن صديقاتي المقربات . . اللاتي هن اخواتي . . من لم يأتوا من بطن أمي

من وثقت بهن . . جلست معهن . . تشاجرنا وتصالحنا . . وكما يقولون " أكلنا عيش وملح مع بعض "

ومن المستحيل . . أن افترق باحداهن

ليس فراق عادي . . إنه فراق الأحبة . .

لا يمكنني أن اصدق إنها كادت أن تضحي بمركب صارت في البحر أعوام . . وذلك بناءا ع سوء ظن

لا اصدق . . إنها بعد أعوام وأعوام . . ظنت إنني ما عندي أخلاقيات

أكلنا سويا . . ضحكنا . . استمتعنا . . خرجنا . . . . وبعد كل هذا " لم تكن تعلم كيف تفكر صديقتها "

والأسوأ . . عندما تمنيتها أن تكن يوما ما زوجة لأخي . . يا الله . . كيف لها بسبب أمنيتي أن تتقطع صداقتنا

لما لم تفكر أنني لم أجد أروع منها زوجة لأخي . . أبهذا تنقلب الأحوال ؟!

وتزداد الطينة بلة . . بكلمات . . من الصعب أن يحملها المرء ع الكتفين

أن تهددني بعدما حدث ما حدث . . بأن لو شخص ما " عزيز عليها " علم بأنه حدثت مشكلة بيني وبينها . . سوف تنهي صداقتنا

ولكن هذه المرة حقيقة . . بعدما علمت بسوء الظن . . وأوقعتني بالظلم

يا الله . . تضع صداقتي في كافة . . ومعرفة الشخص الآخر " من كان بذرة المشاكل بيننا " بما حدث بيننا " في كافة "

لا أتخيل أنه يوم أن أفرح لن أجدها جانبي وأنا في أشد الحاجة إليها

لا أتخيل أنها لن تهاتفني ع هاتف منزلي


لا اتخيل أنني سوف أنتقل للعيش في مكان آخر ولن تحتضنني

لا استطيع أن أصف ما حدث البارحة . . فخسارة صديق وليس أي صديق . . لا احتملها

وفي النهاية لا يسعني سوي شكرها . . ع ما قدمت لي طوال فترة وجودنا ع مركب كنا نسميها الصداقة

شكرا لكي أختي وصديقتي . . أحبك في الله وسأظل أحبك . . ولن اتذكر إلا كل خير كان

وسامحكم الله . . يا من كنتم سبب فراقنا

يوم أن كنا صغارا . . كان في القلب أمل

كنا نلهو لا نبالي . . أينما كان الزلل

كانت الأرض نشيدا . . فيها ألحان الصبا

تسكب الألحان شعرا . . عبقريا لا يمل

ياتري كانت خيالا . . يوم كنا نمتطي

ظهر صنوان الأماني . . أم تراهل لم تزل

لو بطلنا نحلم . . " نموت "

السلام عليكم ورحمة الله وبركاته

.

.

كل واحد فينا عنده هدف . . بيسعي لتحقيقه طول حياته

فكرت لحظة . . أنا هنا . . وهدفي هناك . . طب ولما اوصله ( هيكون شعوري ايه ساعتها )

حسيت بحزن بسيط

وقعدت افتكر كل الأهداف اللي حققتها . . حزنت حزن بسيط برضه

بتبقي مغامرات لذيذة لما الواحد يقع ويقوم ويقع ويقوم ويقاوم ويعافر عشان يوصل هناك

يمكن لما بنتعب بنحس بفرح

أكيد لما نحس خلاص أوشكنا ع الوصول . . هنحس بقلق بسيط ونسأل نفسنا

لما اوصل هناك هعمل ايه تاني ؟

لكن بنرجع نفرح . . عشان أملنا في تحقيق هدف آخر أسمي وأكبر

عشان كده بنعيط من الفرحة . . لما ناخد بطولة . . أو ننجح . . أو في حفلة تكريم

أو تهنئة . . حتي الجواز

لو كل واحد فينا نفسه في بيت مستقل يكون متوج فيه

وكل واحد فينا يفضل يكتب في ليست مواصفات فارس الأحلام

ولما يتحقق . . وييجي يوم الزفاف والكل فرحان . . لكن من قبل الأم وابنها أو بنتها . . أبوها اخوها كده يعني

بيحزنوا حزن بسيط لمفارقة الشخص ده

بعد كده الزوجين يعزموا ع تحقيق هدف آخر ( تحقيق السعادة داخل الأسرة وتكوين أسرة صالحة )

تبدأ الأم تكافح من أجل تربية أبنائها تربية صالحة وإسعاد زوجها

والأب يحاول يضاعف جهده من أجلهم . . وكل من الأب والأم يقوم بدوره حتي ترسي السفينة إلي مقصدها

. .

"علينا ألا نيأس بعد تحقيق الأحلام .. وأن نحضر الأهداف التالية حتي لا نشعر بالفراغ"

ماذا بعد بلوغ القمة ؟!

اتعجب كثيرا لهؤلاء

من يحلمون بصعود قمم الجبال

من يعشقون هدف الصعود لافرست وغيره من القمم

من أجل ماذا ؟!

يري الكثير من المخاطر والوقوع والموت أمام عينيه

أهذا من أجل صورة يضعها تذكار ويقل لأبنائه ها أنا ذا صعدت ؟!

وخير مثال . . الشاب المصري عمر سمرة . . من استطاع تحقيق حلم استمر 12 عاما

إنها لقمة السعادة . . حين تشعر إنك تستطيع أن ترفع علم بلدك أعلي قمة افرست :)

. .

جنــــة

So Sad

In the name of ALLAH

I feel that I'm lonely in my life

I can't live better

and no one can help me , just I can ..

Alot of things are difficult and I can't say anything

I'm a cat in adark side

I'll cry to be relaxed

I hate my childhood

I hate it so much

Everybody told me that I'm child

In the first time , all says it's good , I like it

but nobody can endure me

I can't see my island what's beautiful

I can't see the light room

I can't see the right way

I want someone help me to walk in the right way

someone seeks to know how I think in my mind and help me to arrange all ideas

O , God

Help me to break these problems

محتاجة ادلعها

بسم الله توكلت ع الله

جنتي متضايقة النهاردة . حيرانة في ألف فكرة ودماغها عمالة تودي وتجيب

يبقي ندلعها . . ننعنشها . . ونفرفشها . . ونديها حقها

هعمل معادلة لذيذة توصلني لفكرة مثيرة

من وجهة نظري الشخصية إن سر السعادة في الرضا

رضا الله ورضا الوالدين ورضا النفس

وإن ده هيتحقق لما نعمل موازنة بين الروح والجسد والعقل

و ع طول الواحد بيفشل في إنه يعمل المعادلة دي . . فبيبقي بكل صراحة (( مقصر ))

الروح نغذيها بالأعمال الروحانية

الجسد . . نهتم بالصحة اللي ادهالنا ربنا سبحانه وتعالي أمانة ونخليها زي البمب

العقل . . سره في كلمة " اقرأ "

حطينا الخطة كالعادة في الموازنة . . ولكن المرة دي حطيتها أنا وجهاد وهنمشي عليها بإذن الله تعالي من يوم السبت الجاي

يارب صبرنا وقوينا

حكاية الفوربي . . أنا جوايا أصلا عايزة اسيب بصمة ليا في الجامعة

فلما لقيت التييم كويس وكده قولت ادخل فيه واسيب البصمة . . بس مقلقة . . وحاولت اخللي حد يقنعني

بس للأسف كل الكلام بتاعهم عارفاه . . امممممممم أو غالبا محدش عارف يدخللي من الناحية اللي ممكن تقنعني

وساعات بحس مش عايزة اتعرف ع ناس من خلال الفرق . . وحاساهم كلهم فهموني غلط علشان ترددي

وخايفة أصلا ديه تكون غلطة . . وتجيب غلطات . . خاصة إني حاسة بتأنيب ضمير اليومين دول

والواحد لما ييجي يحاسب نفسه يفتكر الغلط صح ويبني عليه

طب افكر بتعمق أكتر . . علشان أوصل لقرار أكيد

أنا عرضت عليهم اعمللهم أي حاجة يحتاجوها من غير ما اكون ميمبر . . بس أسلوب الرد بصراحة مكانش لطيف

بيقولوا في الفوربي البنات بمية راجل . . بس أنا مش حاسة إني بمية راجل لسبب . . الوقت اللي هقضيه عندهم . . هيبقي فيه حاجات تانية أولي

خاصة إني بعمل موازنة . . فهيبقي أولي بيا بيتي . . ودراستي . . علاقتي بربنا وبصحتي وبدماغي

وإن كان ع البصمة اللي عايزة اسيبها في الجامعة . . فأنا برضه هعرض عليهم خدماتي

وهدور ع فكرة من أفكاري تخليني فعلا اسيب حاجة فيها قبل ما امشي . . تتكتبلي عند ربنا

مش حابة اروح ناحية الفوربي . . وهقضي الوقت في المكتبة أحسن . . واعيد تصميم الفيجن والميشن بشكل أفضل

وهركز أكتر علي أسرتي الحالية والمستقبلية واحاول أسعدهم قدر الإمكان

حاسة الصورة بتعبر عني . . هدلعها خلاص . . والونها . . اديها بريق . . وشوية برونز

هحس في الحر الدنيا برد . . واجدد حياتي يوم بيوم

ابتسم . . فالرائع سيكون أروع

لا تقلقي جنتي . . ما دام الأمل في طريقك . . تنظرين إليه وتعافرين . . بلا يأس

وما دامت الابتسامة في طبعك . . ظأططي :)

كل له دائرته

السلام عليكم ورحمة الله وبركاته

دائرة الصداقة - دائرة الصحوبية - دائرة الزمالة - دائرة المعارف

ديه الدواير اللي في حياتي وكل واحدة وليها أسسها

الصداقة عندي معناها كبير جدااا . . والبنات اللي في الدايرة دي قليلة وهن صديقاتي منذ زمن بعيد

ياما لعبنا وعيطنا . . اتخاصمنا واتصالحنا . . فرحنا وزعلنا . . واتنافسنا . . وبنزور بعض دايما

ولو حد فينا مشافش التاني من مدة . . بنقول عنده ظروف ولما تتحل هنتقابل . . وبيحصل

آية الله + آية سعيد ( ساكنين جمبي وأقرب ما يكون إلي قلبي . . وليا مواقف معاهم من ابتدائي واعدادي .. الخ )

ويوم ما ادخل بيتهم احس بيتهم فرحان . . باباهم ومامتهم واخواتهم . . بحس كأنه بيتي

حنان شوقي . . ( صديقتي الصدوقة من ثانوي . . نفسنا نوصل للوزن المثالي فعلي طول نمشي

بس بما إن حنان هندسة فمضغوطة ع الآخر ومش بنمشي كتير . . بحب حنونتي أوي )

جهاد محمد . . ( من أولي جامعة عرفتها . . شيماء سعيد عرفتني عليها في الدفعة وأنا وشيماء كنا قريبين من بعض ولما حولنا جامعة القاهرة وكنسلت التحويل ورجعت . . اتعرفنا أنا وجهاد ع بعض أكتر وبقت قريبة مني جدا جدا جدا وعرفتها ع والدتي )

دول صديقاتي

الصحوبية . . كتير ومميزات . . ومادام صحبة خير فتوكلنا ع الله . . وليهم مكانة كبيرة عندي . . في منهم في دفعتي . . أو في الدار . . أو كورسات . . أو قوافل . . الخ

الزمالة . . زميلاتي في المدرج . . في الدار . . في كورسات . . كده يعني

المعرفة . . واحدة اتعرف عليها وتعلم فيا أو اعلم فيها . .

ومينفعش نمشي من غير ما نديي لبعض الكونتاكتس علشان نتواصل

هنا بقي تحصل المشكلة

في كتير بيبقي نفسهم تكمل المعرفة ونتواصل دايما . . فأنا لسبب ما أقولها مش ينفع بطريقة لطيفة يعني

وهكذا في الباقي

حاليا بقي لي صاحبة . . عايزة تدخل منطقة الصداقة عندي . . ويمكن زعلانة علشان بتشوفني مع جهاد ع طول

أنا بحب صاحبتي ديه وكل حاجة واكتشفت جواها أبيض بطريقة رهيبة

وبتقوللي إني قافلة ع منطقة الصداقة ومش سامحة لحد يدخلها أبدا

وكلامها صح فعلا . . لأن أنا فعلا مش بحط عيني ع واحدة وأقول عايزاها تكون صديقتي

احنا أكيد في الأول كان معرفة فعشرة وحاجات كتيييييير يمكن تاخد سنين

أنا حيراااانة أوي . . لأني لو مكان هاجر وقولت لواحدة نكون أصدقاء فردت عليا إنه صعب وفهمتني وجهة نظرها

أنا أكيد هتجرح . . أنا بقي حاسة إني هاجر مجروحة مني . . ومش عارفة اعمل ايه خالص

هاجر نفسها زي ما أنا مع جهاد . . اكون معاها كده . . بس أنا فعلا لما بنزل من البيت لغاية ما برجع

ببقي يادوب اقضي مصالح . . احضر محاضراتي . . وبحاول اعوض صحباتي أو الناس اللي اعرفهم قدر الإمكان

وعارفة يمكن اكون مقصرة معاهم . . اهئ اهئ بقي

A friend in need is a friend indeed